Manchester City rrezikoi shumë në FA Cup, duke u detyruar të përmbysë rezultatin kundër Plymouth në raundin e fundit. Vetëm pas aktivizimit të titullarëve kryesorë, skuadra e teknikut Pep Guardiola arriti të rikthehej në lojë dhe të siguronte kualifikimin, por statistikat e ndeshjes nuk janë aspak të denja për një klub të këtij niveli. “Citizens” tentuan 29 goditje, por vetëm 9 përfunduan në kuadrat. Një statistikë shqetësuese, veçanërisht duke marrë parasysh se Plymouth është skuadra e para-fundit në Championship—edhe pse eliminoi Liverpoolin në raundin e mëparshëm.
Për të shpjeguar këtë problem, Guardiola gjeti një arsye befasuese: fajin e ka topi që përdoret në këtë kompeticion. Në konferencën për shtyp, trajneri spanjoll nuk hezitoi të mbështeste teorinë e tij, duke theksuar se dallimi mes këtij topi dhe atyre të përdorur në Premier League dhe Champions League është shumë i madh. Madje, ai sugjeroi se edhe trajnerë të tjerë të skuadrave të mëdha kanë vënë re ndryshime të theksuara
Guardiola fajëson topin për dështimin në finalizim
Për spanjollin Pep Guardiola, problemi është i qartë: topi i FA Cup nuk është i përshtatshëm. Nga 29 tentativat e Manchester City, 20 u humbën, dhe sipas tij, kjo ndodhi për shkak të sjelljes së çuditshme të topit në ajër, duke krijuar trajektore të paparashikueshme.
Në konferencën për shtyp, ai dha një shpjegim të detajuar: “Topi i Champions League është i jashtëzakonshëm, ai i Premier League gjithashtu. Ky këtu nuk është. Normalisht, me këto goditje, topi do të përfundonte në rrjetë. Por është e vështirë për ta kontrolluar. Prej vitesh lojtarët dhe trajnerët e kanë thënë këtë. Nëse e thua kur humbet, duket sikur po ankohesh, por e vërteta është se ky top nuk është i mirë”.
Në Premier League, përdoren topa të Nike, në Champions League, ato të Adidas, ndërsa FA Cuppërdor Mitre, i cili sipas Guardiolës, është problemi kryesor që i pengoi lojtarët e tij të shënonin.
Polemika dhe reagimi i FA
Deklaratat e Guardiolës nxitën menjëherë polemika, dhe Federata Angleze e Futbollit (FA) nuk vonoi të jepte një përgjigje zyrtare. Një zëdhënës i FA mbrojti zgjedhjen e topit duke deklaruar: “Të gjithë topat e përdorur në futbollin profesionist duhet të plotësojnë certifikimin ‘FIFA Quality Pro’, dhe ky top i plotëson të gjitha kriteret e testimit”. Pavarësisht kësaj, Guardiola vazhdon të jetë i bindur se topi i FA Cup ka ndikuar në performancën e ekipit të tij—një justifikim që ka ndarë opinionin mes atyre që e mbështesin dhe atyre që e shohin si një ankesë të ekzagjeruar.
