Me kërkesë të SPAK, Gjykata e Posaçme, ka lëshuar dy masa sigurie për veprën penale të “ushtrimit të ndikimit të paligjshëm në sistemin e drejtësisë” dhe “Shpërdorim të detyrës”.
“Arrest në shtëpi” është caktuar për avokatin Bardhi Koçi ndërsa masë sigurie “Detyrim për t'u paraqitur” është caktuar për një grua, e cila ishte në konflikt me ligjin kur është kryer vepra penale.
Mësohet se pas caktimit te masës së sigurisë janë ushtruar dhe tre kontrolle në banesa të ndryshme.
Raportohet se kontrollet janë kryer në banesën e një oficeri të policisë gjyqësore, si dhe tek shtëpia dhe zyra e një eksperti.
Sipas SPAK, Koçi i ka kërkuar një personi një vlerë parash prej 4 mijë euro, kundrejt një leje ndërtimi, duke i thënë se do të ndërmjetësonte që personi në fjalë të përfitonte truallin e ndërtimit.
Prokuroria e Posaçme sqaroi se Bardhi Koçi me profesion avokat ka kërkuar nga shtetasja P.M. shumën prej 4000 eurosh dhe ka marrë prej saj në formën e përfitimit të parregullt shumën paraprake prej 1000 eurosh, me qëllim ushtrimin e ndikimit në vendimarrjen e gjyqtarit, i cili po shqyrtonte çështjen në ngarkim të saj.
Ndërsa ndaj gruas P.M, SPAK ka caktuar masën e sigurimit personal “Detyrim për t'u paraqitur në policinë gjyqësore” si e dyshuar për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”. Bardh Koçi është emër i njohur për policinë, pasi ai është arrestuar edhe në vitet 2013 e 2015.
