Gazetari Osman Stafa ka denoncuar skandalin e radhës në QSUT, ku një vajzë vetëm 10 vjeçe ka mbetur pa medikament për shkak të mungesave në spitalin dhe farmacinë e QSUT-së.
Stafa thotë se vajza 10-vjeçare vuan nga “artriti reumatoid juvenil” prej 25 ditësh nuk merr medikamente të nevojshme.
Sipas tij, gjilpëra duhet të merret 4 herë në muaj, ndërkohë pacientja e mitur prej 25 ditësh është në pritje.
Reagimi nga Osman Stafa:
“VAJZA 10-VJEÇE 25 DITË PA MEDIKAMENT!
I.H, është një vajzë 10-vjeçe.
Ajo vuan nga “artriti reumatoid juvenil”.
Çfarë është kjo sëmundje?
Artriti juvenil (JA) është artrit që ndodh tek fëmijët. Shkakton enjtje të kyçeve, dhimbje, ngurtësi dhe humbje të lëvizjes. Mund të prekë çdo nyje, por është më e zakonshme në gjunjë, duar dhe këmbë. Në disa raste mund të prekë edhe organet e brendshme.
Dhe kjo vajzë 10 vjeçe, ka 25 ditë, thonë prindërit, pa bërë një gjilpërë, që duhet ta marrë me patjetër, që mos përkeqësohet.
Sot kanë shkuar familjarët e vajzës në Farmacinë e QSUT, pasi u kishin thënë se sot do të vinte. Atje u kishin thënë që jo, nuk është as sot.
Ajo gjilpërë duhet të merret çdo javë. Pra të enjten e çdo jave. 4 herë në muaj. Ndërkohë vajza ka 25 ditë pa trajtim. Gati 1 muaj.
Kush mban përgjegjësi për këtë?
A mbani përgjegjësi Ministrja e Shëndetësisë Albana Koçiu?
A kjo është shëndetësia falas, Kryeministër Edi Rama?
A keni mëshirë për fëmijët?
A e dini se çfarë mund t’i ndodhë kësaj vajze apo edhe fëmijëve të tjerë që nuk e marr këtë ilaç?
A kështu duhet të bëhet çdo gjë? Duhet të denoncohet mungesa, pa të sigurohet?”, shkruan Osman Stafa.
