Ukraina dhe Shtetet e Bashkuara kanë rënë dakord për kushtet e një marrëveshjeje për mineralet dhe që mund ta nënshkruajnë atë që këtë javë.
Gazeta ukrainase “Economic Pravda” citon një version të marrëveshjes, sipas së cilës Kievi do të paguajë 50% të të ardhurave nga burimet e tij natyrore shtetërore në një fond që do të investonte në Ukrainë.
Marrëveshjes i mungojnë garancitë amerikane të sigurisë për Ukrainën, për të cilën thuhet se po kërkonte Kievi. Por gjithashtu ajo nuk përmend as shifrën prej 500 miliardë dollarë që Presidenti i SHBA Donald Trump po kërkonte si kompensim për mbështetjen e Uashingtonit për Kievin për të shmangur pushtimin e Moskës.
Marrëveshja mund të nënshkruhet që të premten, në një vizitë të mundshme nga një delegacion i Kievit në Uashington. Ajo pritet të nënshkruhet nga Ministri i Jashtëm ukrainas Andrii Sybiha dhe Sekretari i Shtetit i SHBA-së Marco Rubio.
Presidenti ukrainas Volodymyr Zelenskyy deri më tani ka refuzuar të nënshkruajë dy projekt-marrëveshje të propozuara nga administrata e Trump, duke thënë se kushtet përfshinin heqjen dorë nga të ardhurat nga mineralet, naftën dhe gazin nga Kievi, plus të ardhurat nga portet dhe infrastrukturat e tjera në shumën prej 500 miliardë dollarësh duke i cilësuar ato si mjaft të ashpra.
"Unë nuk do të nënshkruaj atë që 10 brezat e ukrainasve do të duhet të paguajnë," - tha Zelenskyy në një konferencë për shtyp të dielën. Por Trump këmbënguli se një "marrëveshje përfundimtare" është "shumë afër" dhe se ajo do të përfshijë "minerale të rralla dhe gjëra të tjera të ndryshme".
Ukraina ka depozita të mëdha elementesh dhe mineralesh kritike, nga litiumi te titani, të cilat janë jetike për prodhimin e teknologjive moderne dhe shumë të lakmuara në garën globale. ©LAPSI.al
