Një ngjarje tragjike ka ndodhur në Shkodër, ku një 3-vjeçar ka humbur jetën në Spitalin Rajonal, ndërsa motra e tij 7-vjeçare ndodhet në gjendje të rëndë në QSUT. Policia ka bërë publike detajet e para të hetimit, duke sqaruar se fëmijët ishin paraqitur fillimisht në spital më 21 shkurt nga babai i tyre, shtetasi S.H., me dyshime për virozë stine.
Pas trajtimit, ata u larguan për në shtëpi, por gjendja e tyre u përkeqësua gjatë natës. Mëngjesin e 22 shkurtit, prindërit i dërguan sërish në spital, ku fatkeqësisht 3-vjeçari ndërroi jetë, ndërsa motra e tij u transportua drejt Tiranës për kujdes të specializuar.
Mjekët e Shkodrës dyshojnë për një helmim në gjak, por analizat e plota janë dërguar në toksikologjinë e Tiranës për një konfirmim zyrtar. Nën drejtimin e Prokurorisë, hetimet vijojnë për të përcaktuar shkakun e saktë të vdekjes së fëmijës dhe rrethanat e ngjarjes.
Njoftimi i policisë:
Më datë 21.02.2025, shtetasi S. H. ka dërguar për mjekim në Repartin e Pediatrisë në Spitalin Rajonal Shkodër, 2 fëmijët e tij, vajzën 7 vjeçe dhe djalin 3 vjeç, të dyshuar me virozë stine.
Pas mjekimit, shtetasi S. H. dhe 2 fëmijët janë larguar në banesë.
Për shkak të rëndimit në gjendjes shëndetësore të fëmijëve, në banesë, më datë 22.02.2025, shtetasi S. H. i ka dërguar përsëri 2 fëmijët për mjekim në Repartin e Pedriatrisë në Spitalin Rajonal Shkodër.
Pavarësisht ndihmës mjekësore, 3-vjeçari ka humbur jetën, ndërsa 7-vjeçarja u dërgua në QSUT, për mjekim të specializuar.
Në drejtimin e Prokurorisë vijojnë hetimet për përcaktimin e shkakut të humbjes së jetës së 3-vjeçarit.
