Pas sulmit të djeshëm që Rama i bëri task-forcës së përgatitur nga SPAK për monitorimin aktiv të zgjedhjeve të 11 majit, ambasadori i BE në Tiranë, Silvio Gonzato i ka dalë në mbrojtje kësaj iniciative.
Gjatë fjalës së tij në një aktivitet të organizuar nga shoqëria civile, Gonzato tha se blerja e votës dhe presioni ndaj votuesve vijon të jetë problem në Shqipëri.
Më tej ai shtoi se mirëpret nismësn e ndërmarrë nga aktorët kryesorë, Komisioni Qendror i Zgjedhjeve, Prokuroria e Përgjithshme, SPAK dhe Policia e Shtetit, për të koordinuar përpjekjet e tyre para zgjedhjeve të 11 majit, për të adresuar krimet e mundshme zgjedhore, si garanci për besim në këto zgjedhje.
Lexo më tej: Edhe një herë kundër Prokurorisë/ Frika e Ramës nga përgjimet në zgjedhje
Ndërkohë evidentoi se keqpërdorimi i burimeve administrative është një tjetër çështje e ngritur në raporte të ndryshme, që kërkon më shumë vëmendje për të siguruar kushte të barabarta loje.
“Blerja e votës dhe presioni ndaj votuesve vijon të jetë problem në Shqipëri. Mirëpres nismën e ndërmarrë nga aktorët kryesorë, si Komisioni Qendror i Zgjedhjeve, Prokuroria e Përgjithshme, SPAK dhe Policia e Shtetit, për të koordinuar përpjekjet e tyre para zgjedhjeve të 11 majit, për të adresuar krimet e mundshme zgjedhore, si garanci për besim në këto zgjedhje. Dhe mezi po pres që të dëgjoj më shumë nga këto institucione lidhur me nismën e tyre dhe koordinimin”, tha Gonzato.
Çfarë tha Rama dje:
“Nuk mund dot të survejohen partitë politike në një proces elektoral. Unë uroj që kjo do të jetë një lajthitje e momentit dhe menjëherë të ndalet çdo lloj survejimi në territor, sepse nuk mundet dot kurrën e kurrës që ne të kthehemi në kohëra kaq të errëta saqë kush merret me politikë të survejohet.”
©LAPSI.AL
