Merret në mbrojtje gjyqtari i Fierit, Vladimir Cjapi, pas kërkcënimeve me jetë që kishte marrë nga Arben Isufi, i njohur si “Ben Qimja” (në foton lart).
Burime për mediat bëjnë me dije se paraditen e sotme Këshilli për Mbrojtjen e Magjistratëve vendosi t’i ofrojë gjyqtarit mbrojtje të posaçme për një periudhë 6-mujore.
Vendimi është marrë nga komisioni përkatës, ku marrin pjesë përfaqësues të KLGJ-së, Policisë së Shtetit dhe Gardës së Republikës.
Pas kërcënimeve ndaj gjyqtarit, policia ka kryer kontrolle në banesat dhe ambientet që janë në pronësi të “Ben Qimes” ku u gjetën 1 pistoletë, 2 targa të huaja, jelek të policisë, 2 pajisje DVR, 6 celularë dhe dokumente zyrtarë. Sipas Policisë së Fierit, këto sende të sekuestruara do t’i shërbejnë hetimit.
55-vjeçari është shpallur në kërkim për veprat penale “Kanosja e gjyqtarit” dhe “Prodhimi dhe mbajtja pa leje e armëve, armëve shpërthyese dhe municionit”, ndërsa në të gjithë qytetin e Fierit po kryhen kontrolle intensive për kapjen e tij.
