Përgjysmimi i pagës ka detyruar metalurgët e uzinës së Ferrokromit në Komsi të Matit të protestojnë për të kërkuar zbatimin e kontratës.
Sipas tyre kompania turke ka ulur vetëm pagën e punëtorëve dhe jo të administratës dhe për këtë arsyee ata kanë deklaruar se do të vijojnë protestën deri në plotësimin e kërkesave të tyre.
Metalurgët e uzinës së Ferrokromit në Komsi të Matit kanë protestuar këtë të martë ndaj kompanisë turke Yildirim Holding Group e cila prej disa muajsh ka përgjysmuar ditët e punës për punëtorët. Metalurgët thonë se kompania ka shkelur kontratën dhe se i ka diskriminuar pasi përgjysmimi i rrogës është bërë vetëm për ta dhe jo për administratën.
Metalurgët shprehen se nuk pranojnë këto kushte pasi janë në shkelje të kontratës dhe se do të përshkallëzojnë protestën e tyre deri në rikthimin e rrogës së plotë dhe madje protesta e tyre do të shkojë deri në Tiranë.
Metalurgët i kërkojnë kompanisë reflektim dhe zgjidhjen e problemit ndryshe do të përshkallëzojnë protestat dhe do t'i drejtohen të gjitha institucioneve ligjzbatuese.
