Një aksident i rëndë ka ndodhur orët e para të mëngjesit të kësaj të hëne në rrugën Tiranë-Durrës, ku një 28-vjeçar ka humbur jetën dhe tre persona të tjerë janë plagosur.
Sipas informacioneve paraprake, shtetasi Gëzim Muçaj, duke drejtuar furgonin e tij për të shkuar në punë, ka humbur kontrollin dhe është përplasur me trafikndarësen. Pasi ka dalë nga makina bashkë me tre pasagjerët për të parë dëmet e mjetit, ata janë goditur nga një tjetër automjet me drejtues shtetasin I. L.
Si pasojë e goditjes, Gëzim Muçaj ka humbur jetën në vendngjarje, ndërsa tre pasagjerët janë dërguar në spital për trajtim mjekësor. Drejtuesi i automjetit të dytë, I. L., është shoqëruar nga policia për veprime të mëtejshme procedurale.
