Java e 22-të e Bundesligës përfundon me një barazim pa gola (0-0) mes Bayern Munich dhe Bayer Leverkusen, në sfidën mes vendit të parë dhe të dytë në renditje. “Aspirinat” zhvilluan një lojë më të mirë dhe goditën dy herë traversën, por mbeten tetë pikë pas bavarezëve. Borussia Dortmund u mposht 2-0 në derbin kundër Bochum, ndërsa Freiburg fitoi 1-0 ndaj St. Pauli dhe afrohet vetëm një pikë larg Leipzig. Fitore 2-1 për Wolfsburg në Stuttgart dhe për Borussia Mönchengladbach kundër Union Berlin.
BAYER LEVERKUSEN - BAYERN MUNICH 0-0
“BayArena” ishte skena e përballjes së shumëpritur mes Bayern Munich kryesues dhe kampionëve në fuqi të Bayer Leverkusenit, aktualisht ndjekësit më të afërt në renditje. Pjesa e parë nisi e ekuilibruar, por pas minutës së 20-të vendasit nisën të impononin lojën e tyre. Wirtz testoi Neuer me një goditje të rrezikshme, ndërsa Frimpong dhe Tella goditën traversën nga pozicione të favorshme. Wirtz provoi gjithashtu një goditje të befasishme nga mesi i fushës, por topi përfundoi jashtë. Bayern tentoi të reagojë në fund të pjesës së parë me një goditje dënimi të Kimmich, por Kane rrezikoi të dëmtohej në fytyrë nga devijimi i topit. Fatmirësisht, anglezi pësoi vetëm një goditje të fortë.
Lexo më tej: Dygolësh i Kane e tris i Bayern: bavarezët shkëputen në krye nga Leverkusen
Në pjesën e dytë, Bayern i Kompany e pati të vështirë të kontrollonte lojën, ndërsa Leverkuseni vazhdoi të rrezikonte. Në minutën e 59-të, Tella provoi me një goditje fluturimthi në zonë, por pa sukses. Ish-lojtari i Southamptonit iu afrua përsëri golit me një goditje me kokë në minutën e 66-të, por këtë herë u ndal nga Stanisic mbi vijën fatale. Në minutat shtesë, Adli detyroi Neuer të bënte një tjetër pritje të shkëlqyer, ndërsa Wirtz shpërdoroi një rast të artë. Ndeshja u mbyll 0-0, me Bayern që arrin në 55 pikë, ndërsa Leverkusen mbetet në 47, duke ruajtur diferencën prej tetë pikësh.
BOCHUM - BORUSSIA DORTMUND 2-0
Borussia Dortmundi vizitoi Bochumin, ekipin e fundit në renditje, në atë që njihet si “derbi i vogël i Ruhr-it”. Verdhezinjtë vinin pas një fitoreje bindëse 3-0 në Lisbonë në play-off-in e Champions League, por u shkatërruan në pjesën e parë, ku Masouras realizoi një dopietë brenda dy minutave (33’ dhe 35’). Kjo fitore e papritur i dha Bochumit një avantazh të përkohshëm ndaj Kielit, duke u ngjitur në kuotën e 14 pikëve. Ndërkohë, Dortmundi mbetet në 29 pikë, duke vazhduar një sezon zhgënjyes në kampionat.
STUTTGART - WOLFSBURG 1-2
Në “MHPArena”, Stuttgart priti Wolfsburgun në një ndeshje të luftuar. Vendasit kaluan në avantazh në minutën e 72-të me një gol të bukur të Woltemade, pas një aksioni individual. Megjithatë, reagimi i “Ujqve” ishte i menjëhershëm. Tomas barazoi në minutën e 77-të, ndërsa dhjetë minuta më vonë Amoura realizoi golin e fitores nga pika e penalltisë. Wolfsburgu arrin në 33 pikë dhe afrohet me Stuttgartin, i cili mbetet në kuotën e 35 pikëve.
ST. PAULI - FREIBURG 0-1
Në “Millerntor-Stadion” të Hamburgut, St. Pauli priti Freiburgun në një ndeshje ku Vincenzo Grifo pati një mundësi të artë për të kaluar miqtë në avantazh në fundin e pjesës së parë. Arbitri akordoi një penallti për Freiburgun, por Grifo gaboi, duke u ndalur nga portieri Vasilj, i cili priti lehtësisht “panenkën” e italianit. Rezultati mbeti 0-0 deri në minutën e 88-të, kur një autogol i Treu i dha fitoren Freiburgut. Me këtë sukses, ekipi i Schuster arrin në 36 pikë, vetëm një më pak se Leipzigu i vendit të katërt. St. Pauli mbetet në 21 pikë.
UNION BERLIN - BORUSSIA MÖNCHENGLADBACH 1-2
Në Berlin, Unioni u përball me Borussia Mönchengladbach. Vendasit nisën mirë, me Hollerbach që goditi traversën në minutën e 4-t, por ishin miqtë ata që gjetën golin e parë në minutën e 11-të me Ullrich. Gladbach dyfishoi rezultatin në minutën e 26-të me Kleindienst, ndërsa Hack humbi një mundësi tjetër të artë në kohën shtesë të pjesës së parë, kur gjuajtja e tij u ndal nga traversa.
Union Berlini u hodh në sulm në pjesën e dytë dhe ngushtoi diferencën në minutën e 63-të me një penallti të realizuar nga Ilić, por nuk mundi të shmangte humbjen. Mönchengladbach fitoi 2-1 dhe ngjitet në 34 pikë, ndërsa skuadra berlineze mbetet në 24.
BUNDESLIGA GERMANY
St. Pauli 0-1 Freiburg
Union Berlin 1-2 Borussia M'gladbach
VfB Stuttgart 1-2 Wolfsburg
VfL Bochum 2-0 Borussia Dortmund
Bayer Leverkusen 0-0 Bayern Munich
