Katër të mitur janë arrestuar te ish-Fusha e Aviacionit në Tiranë, pasi tentuan të grabisnin një 21-vjeçar. Policia ka identifikuar dhe arrestuar të rinjtë, të moshave 15, 16 dhe 17 vjeç. Të miturit dyshohen se, ditën e djeshme, tentuan t’i merrnin me dhunë sendet personale një të riu.
'Specialistët për Hetimin e Krimeve në Komisariatin e Policisë Nr. 2, pas marrjes së kallëzimit të një 21-vjeçari se 4 të mitur kishin tentuar t’i merrnin me dhunë sendet personale, kanë organizuar punën menjëherë dhe, pas veprimeve të shpejta dhe të koordinuara, bënë të mundur identifikimin dhe arrestimin e 4 shtetasve të mitur, të moshave 15, 16 dhe 17 vjeç.', njofton policia.
Policia ka nisur hetime të mëtejshme për të zbardhur nëse këta të mitur janë të përfshirë edhe në ngjarje të tjera të ngjashme që kanë ndodhur në Tiranë. Materialet janë dërguar në Prokurori për veprime të mëtejshme.
