Një gjykatës federal shtyu të enjten edhe me një javë pauzën për zbatimin e planit të administratës Trump për t’u dhënë leje me detyrim mijëra punonjësve të Agjencisë Amerikane për Zhvillim Ndërkombëtar (USAID), ndërsa po shqyrton padinë e ngritur nga sindikatat mbi këtë çështje.
Gjykatësi i Uashingtonit Carl Nichols tha gjatë një seance se ishte i shqetësuar mbi sigurinë e punonjësve të USAID-it të vendosur jashtë vendit. Ai nuk mori vendim mbi ankimin e sindikatave për një urdhër më të gjerë dhe afatgjatë që ndalonte shkurtimet agresive në operacionet e agjencisë që zbaton ndihmën për vendet e huaja.
Disa orë pas inaugurimit të tij më 20 janar, Presidenti Donald Trump, urdhëroi ndërprerjen e gjithë ndihmës që Shtetet e Bashkuara ofronin për vendet e tjera, për t’u siguruar që ajo të jetë në përputhje me politikën e tij “Amerika e para”. Masa nxiti kaos në USAID, agjencinë kryesore amerikane që ofron ndihmë për vendet e huaja.
Pas nënshkrimit të urdhrit ekzekutiv, Departamenti i Shtetit lëshoi direktiva për ndalimin e punës, duke ndalur gjithashtu programet e ndihmës që kanë shërbyer për të shpëtuar jetë njerëzish në të gjithë botën, me përjashtime të kufizuara që përfshinin dërgimin urgjent të ushqimeve./VOA
