Pas akuzave të Veliajt, SPAK deklaroi se statusi "i dënuar" për të, në kërkesën për masë sigurie është marrë nga Drejtoria e Përgjithshme e Burgjeve. Kjo e fundit ka bërë një sqarim për këtë çështje duke u shprehur se në Regjistër Veliaj figuron "i padënuar", por në rastet kur kërkohet "vërtetimi historik" përfshihen edhe të dhënat me vendimet e mëparshme, ndaj në rastin në fjalë ka dalë "i dënuar".
"Në përgjigje të interesimit të mediave, Drejtoria e Përgjithshme e Burgjeve bën me dije se, në përgjigje të kërkesës së Prokurorisë së Posaçme Kundër Korrupsionit dhe Krimit të Organizuar, me shkresën nr. 2215/prot., datë 12.02.2025, ka përcjellë vërtetimin e gjendjes gjyqësore për shtetasin E. V., i biri i L. dhe Sh., lindur më 17.12.1979. Pas verifikimeve në Regjistrin e Gjendjes Gjyqësore, ai rezulton i padënuar dhe ndaj tij janë dhënë tre vendime pafajësie.
Sqarojmë se, në rastet kur kërkohet vërtetimi me historik, përfshihen edhe të dhënat mbi vendimet e mëparshme, përfshirë pafajësitë apo vendimet e rehabilitimit, në përputhje me legjislacionin në fuqi. Pra, çdo herë kur printohet Vërtetimi i Gjendjes Gjyqësore me shënime, del dhe statusi i dënuar si në këtë rast" - thuhet në reagimin e Drejtorisë së Përgjithshme të Burgjeve. /LAPSI.al
