Dalin detaje të reja nga seanca maratonë prej 6 orësh që u mbajt këtë të mërkurë në Gjykatën e Posaçme Kundër Krimit të Organizuar dhe Korrupionit për kryebashkiakun e Tiranës Erion Veliaj, bashkëshorten e tij Ajola Xoxa dhe 6 biznesmenët.
Gjatë fjalës së tij Veliaj ka deklaruar se vila në Qerret nuk është e tij, por e prindërve të Ajola Xoxës. Ai është shprehur se nuk ka asgjë të pazakontë që lodrat e fëmijës së tij të jenë gjendur në shtëpine gjyshërve.
"Nuk më është shpjeguar edhe sot pse jam i arrestuar, unë një kryetar bashkie që jam votuar nga populli i Tiranës, kam bërë detyrë time. I kam hyrë në hak familjes se kam punuar edhe të shtunë edhe të diele edhe për festa kam punuar.
Por mallkuar qoftë ai që punon në këtë vend, se bëhet objekt sulmi dhe gjendet në këtë situatë qe jam unë sot. Vila në Qerret nuk është e jona, është e natyrshme që aty do gjenden lodrat e fëmijës sim dhe se bashkëshortja ime është fëmijë i vetëm dhe vjehrra ime dhe nuk e di pse duket kaq e panatyrshme që të jenë lodrat e fëmijës tek shtëpia e gjyshes", - ka deklaruar Veliaj.
Avokati mbrojtës i kryebashkiakut ka kërkuar zbutje të masës, përkatësisht “hetim në gjendje të lirë kundrejt garancisë pasurore” për Erion Veliajn dhe “detyrim paraqitje” për bashkëshorten e tij, Ajola Xoxa.
Gjyqtari Erion Bani është tërhequr për të marrë vendimin ndaj Veliajt, Xoxës dhe biznesmenëve të tjerë nën akuzë. ©LAPSI.al
