Emigrantët dhe azilkërkuesit që mbërrijnë në Britani ilegalisht, kryesisht duke kaluar Kanalin Anglez me gomone, nuk do t'u jepet "në parim" nënshtetësia britanike. Sipas udhëzimeve të reja të qeverisë britanike të publikuara të hënën dhe drejtuar shërbimeve përgjegjëse për shqyrtimin e kërkesave për shtetësi, aplikimet e emigrantëve që kanë hyrë ilegalisht në Britani në përgjithësi do të refuzohen pavarësisht nga sa kohë kanë qenë në vend.
Zyra e Brendshme Britanike sqaroi sot se tashmë kishte rregulla që pengonin ata që kishin hyrë në vend ilegalisht të fitonin shtetësinë. Ata theksojnë se kjo direktivë forcon masat ekzistuese për të bërë të qartë se kushdo që hyn në Britani ilegalisht, veçanërisht me anije, rrezikon t'i refuzohet kërkesa për nënshtetësinë britanike.
Qeveria e kryeministrit laburist, Keir Starmer po miraton kështu një pjesë të politikës së paraardhësit të tij konservator Rishi Sunak. Laburistët janë nën presion për çështjen e emigracionit, përballë sondazheve që tregojnë rritjen e partisë anti-emigracion Reforma në Mbretërinë e Bashkuar të Nigel Farage, e cila befasoi publikun në zgjedhjet e përgjithshme të korrikut duke fituar pesë vende në parlament.
Megjithatë, shtrëngimi i politikës së emigracionit nga ana e qeverisë u kritikua nga anëtarët e Partisë Laburiste.
"Nëse i japim dikujt statusin e refugjatit, nuk është e drejtë t'i mohojmë atij mundësinë për t'u bërë shtetas britanik," komentoi Stella Chrissy për X.
Organizata joqeveritare Lëvizja e Lirë, e cila merret me politikën e emigracionit dhe azilit, vlerësoi se këto ndryshime mund të parandalojnë një numër të madh refugjatësh që të marrin nënshtetësinë britanike dhe se ato dëmtojnë integrimin.
Qeveria Starmer ka braktisur planin e diskutueshëm të konservatorëve për të deportuar emigrantët e parregullt në Ruanda, por është zotuar të reduktojë imigracionin legal dhe ilegal. Në vitin 2024, afërsisht 36,810 migrantë kaluan Kanalin Anglez me varka të vogla dhe arritën në Britani, një rritje prej 25% krahasuar me vitin 2023, sipas Zyrës së Brendshme Britanike.
