Goli i tij i parë në Champions League në një mbrëmje që me siguri do ta ketë të vështirë ta harrojë në jetën e tij. Samuel Mbangula ishte heroi i fitores së Juventus, që triumfoi 2-1 në ndeshjen e parë të playoff-it për kualifikimin në fazën e 1/8-ave, duke lënë gjithçka të hapur për sfidën e kthimit kundër PSV-së. Sulmuesi i ri belg u shfaq menjëherë pas ndeshjes para kamerave të Sky, për të analizuar takimin, për të ndarë përshtypjet e tij pas kësaj fitoreje dhe ndoshta për të vlerësuar edhe paraqitjen e tij.
Zakonisht, pas golit të parë në Champions, një 21-vjeçar do të ishte në qiellin e shtatë, por Mbangula i befasoi të gjithë drejtpërdrejt, duke treguar një pjekuri të jashtëzakonshme për moshën e tij. Belgu nuk arriti të ndihej i kënaqur me paraqitjen e tij, por u lumturua vetëm për fitoren e rëndësishme të skuadrës. “Nuk jam i kënaqur, shënova gol, por sot nuk u futa mirë në lojë, mund të bëj shumë më mirë dhe nuk ka justifikime”, tha ai, duke qenë tejet kritik ndaj vetes në fund të ndeshjes.
Gazetari i Sky, Giovanni Guardalà, i cili po raportonte nga Torino për ndeshjen e Juventusit, u përpoq të thellonte më shumë këtë deklaratë të djaloshit Mbangula. Ai donte t’i jepte një këndvështrim më pozitiv, veçanërisht duke pasur parasysh rëndësinë e golit të tij për sezonin e Juventus. Por belgu ishte i palëkundur. “Një buzëqeshje mund ta bësh megjithatë, është goli yt i parë në Champions”, e ngacmoi gazetari, por Mbangula këmbënguli në vetëkritikën e tij. “E di, por është e vështirë për një lojtar të buzëqeshë kur e di që paraqitja e tij nuk ka qenë e mirë”, u përgjigj ai.
Mbangula shpjegon se si cilësia e Juventus mund të bëjë diferencën
Mbangula u tregua i pjekur dhe i qartë edhe në analizën e përgjithshme të ndeshjes së Juventusit. “Ne e dimë që kur pësojmë gol, duhet të vazhdojmë të luajmë njësoj si më parë, sepse e kishim ndeshjen nën kontroll edhe pas golit të tyre”, theksoi sulmuesi belg, i cili u aktivizua në pjesën e dytë në vend të Yildiz. “Me cilësinë që kemi, mund të shënojmë shumë gola dhe të fitojmë ndeshje”.
Mbangula hyri në lojë pas pushimit, duke zëvendësuar turkun Yildiz – një lëvizje disi e papritur – por në fund doli të ishte vendimtar për Juventus.
