Shumë avantazh për gjuajtësin e penalltisë, një raport tepër i pabalancuar në favor të ekipit që përfiton nga kjo goditje krahasuar me atë që e pëson: kjo është arsyeja që e ka shtyrë jo cilindo, por Pierluigi Collina, kreun e Komisionit të Arbitrave në FIFA, të propozojë pranë IFAB – organit që administron rregullat e lojës së futbollit – një ndryshim që do të përbënte një revolucion të vërtetë në mënyrën se si ekzekutohen penalltitë.
Bëhet fjalë për “one shot”, pra një goditje e vetme që përbën penalltinë, duke përjashtuar mundësinë e shtyrjes në rrjetë nga lojtarët e tjerë të ekipit sulmues. Ose gol, ose asgjë – madje edhe nëse portieri arrin ta ndalë gjuajtjen, loja nuk do të vazhdonte me një goditje nga këndi, por me një gjuajtje nga porta për ekipin mbrojtës. Një pritje ndaj penalltisë do të ishte përfundimtare: asnjë rigoditje.
Collina ka propozuar penalltitë pa rigoditje: rregulli “one shot”.
“Besoj se ekziston një pabarazi e tepruar mes shanseve që ka sulmuesi dhe atyre të portierit – argumenton Collina për Repubblica – Në mesatare, 75% e penalltive shndërrohen në gol, dhe shpesh një penallti përfaqëson një mundësi më të madhe se ajo që është mohuar nga faulli. Dhe për më tepër, u jepet edhe mundësia për të luajtur topin e kthyer nga portieri? Sipas mendimit tim, portierët duhet të ankohen”.
Ish-arbitri nga Bolonja – sot 64 vjeç dhe ende figura më me ndikim në botën e arbitrimit – ka nisur lëvizjet për të ndryshuar një aspekt të lojës që nuk është prekur që nga zanafilla e futbollit, çka tregon edhe vështirësinë e një reforme të tillë: “Kam folur për këtë në diskutimet që kemi pasur me IFAB-in: një zgjidhje është “one shot”. Ashtu si në penalltitë pas kohës shtesë: nuk ka rigoditje, ose shënon ose loja rifillon me një goditje nga porta. Pikë. Kështu shmanget edhe kaosi që ndodh sot para një penalltie, me lojtarët që mblidhen përreth zonës. Duken si kuajt e hipodromit para nisjes së Palio di Siena…”.
Rregulli “one shot”: ose shënon, ose loja rifillon nga porta
International Football Association Board (IFAB) është i njohur për ruajtjen e traditave të futbollit dhe çdo ndryshim i rregullave kërkon kohë dhe debat të gjatë. Por nëse një propozim vjen nga dikush si Collina, me argumente të forta, nuk është e pamundur që në të ardhmen rregulli i ri i penalltive të bëhet realitet, duke sjellë një ndryshim historik në këtë aspekt të lojës.
