Kryeministri Edi Rama nuk ka bërë ende asnjë koment për arrestimin e Erion Veliajt, një nga njerëzit më të afërt dhe më të pushtetshëm pranë tij.
Kreu i qeverisë ndërpreu axhendën e takimeve në Shkodër dhe u kthye menjëherë në Tiranë sapo kryebashkiakun e shoqëruan në qeli.
Më pas u mbyll në zyrën e tij dhe nuk mori pjesë në mbledhjen e grupit parlamentar edhe pse zhvillohej pak metra larg zyrës së tij në selinë e kryesisë së Kuvendit.
Nuk u shfaq as në seancën Kuvendit edhe pse kreu i opozitës Sali Berisha kërkoi me ngulm që ai të vinte në seancë.
Në rrjetet sociale të mbushura me komente për Veliajn, nuk bëri asnjë koment. Në mbrëmje publikoi në Facebook vetëm një lajmërim për seancën e mëngjesit të së martës “sy më sy” ku u përgjigjet pyetjeve që vijnë nga qytetarët.
Besohet se në këtë dalje nuk do të mungojë edhe një koment për prangosjen e Veliajt. ©LAPSI.al
