Komisioni Qendror i Zgjedhjeve në Kosovë vijon të publikojë rezultatet zyrtare që vijnë nga qendrat e numërimit të votave të zgjedhjeve të kësaj të diele.
Tashmë janë numëruar 50.89% e votave dhe sipas rezultateve që jep KQZ-ja, Lëvizja Vetëvendosje në pushtet prin me 37.5% të votave. Me këtë rezultat partia e Albin Kurtit ndalet në 41 mandate në Kuvend.
Në vend të dytë vjen Partia Demokratike e Kosovës me 29.8% të votave që do të përktheheshin në 33 mandate në Kuvend.
Në vend të tretë është Lidhja Demokratike e Kosovës me 16.29% të votave ose 18 mandate në kuvend.
Koalicioni AAK dhe NISMA kanë 7.92% të votave duke u dhënë 8 ulëse në parlament.
Ky është rezultati i 1289 kutive nga 2533 që janë gjithsej. Ka ende shumë vota për t’u numëruar pasi këto rezultate nuk përfshijnë nuk përfshijnë votat me kusht, votat e personave me nevoja të veçanta dhe votat nga jashtë Kosovës.
Komisioni Qendror i Zgjedhjeve të Kosovës njoftoi se pjesëmarrja në zgjedhje ka qenë 40.04%. Nga 1 970 944 shtetas me të drejtë vote kanë votuar 789 172 persona.
Faqja online e KQZ-së së Kosovës ku shfaqen rezultatet është mjaft e ngadaltë dhe ka pasur disa herë bllokime. Zëdhënësi i KQZ-së, Valmir Elezi u shpreh se kjo ka ndodhur për shkak të interesimit të madh të qytetarëve për të hyrë në platformën e rezultateve. Kjo ka shkaktuar mbingarkesë në sistem.
“Të gjitha ekipet e KQZ-së janë duke punuar në terren dhe duke dërguar të dhënat të cilat po bëjmë përpjekje që t’i transmetojmë në kohë sa më të shpejtë”, - tha Elezi. /LAPSI.al
