Një ndeshje basketbolli për të rinj u bë skena e një episodi të shëmtuar racizmi. Gjatë sfidës së kampionatit U-19 për femra mes Happy Basket Rimini dhe Nuova Virtus Cesena, një tifoze nga tribunat ofendoi rëndë një lojtare të skuadrës së Riminit, duke e quajtur “majmun”. Lojtarja nuk e priti në heshtje, por tentoi të merrte vetë drejtësinë, duke krijuar momente tensioni që detyruan ndërhyrjen e spektatorëve të tjerë. Skuadra vendase ka vendosur të marrë masa, duke ngritur padi kundër gruas.
Fyerja raciste kapet në kamera, lojtaria reagon me zemërim
Ngjarja u regjistrua drejtpërdrejt në një video të publikuar në rrjetet sociale, e cila u filmua nga tribunat. Në pamje dëgjohet një grua që i drejtohet me fyerje lojtares së Riminit: “E sheh??? Po çfarë dreqin bën! Kush je ti? Një qen me zinxhir?? Nuk të vjen turp??? Je një majmun!!!”
Pasi dëgjoi ofendimin, lojtarja nuk qëndroi e heshtur. E revoltuar, ajo u drejtua drejt tribunave, duke kapërcyer barrierën me qëllim për t’u përballur me gruan. Situata u tensionua ndjeshëm, por ndërhyrja e shpejtë e spektatorëve dhe stafit shmangu një përplasje fizike.
Autorja e fyerjeve është nëna e dy lojtareve të Nuova Virtus Cesena
Sipas informacioneve, gruaja që bëri komentet raciste është nëna e dy lojtareve të skuadrës së Cesena. Ironikisht, vetë ajo e kishte regjistruar videon, e cila më pas u bë provë kryesore për ngjarjen. Pas incidentit, lojtaren e ofenduar e përjashtuan nga ndeshja, ndërsa gruaja u nxor jashtë palestrës. Në një përballje me tifozë të tjerë dhe disa drejtues të skuadrës së Riminit, ajo u përpoq të justifikohej: “Nuk e thashë me qëllim racist. Më doli nga goja”. Megjithatë, Happy Basket Rimini ka vendosur të ngrejë padi në polici, duke pasur mbështetjen e plotë edhe nga skuadra kundërshtare.
Reagimi zyrtar i klubit Nuova Virtus Cesena
Skuadra e Nuova Virtus Cesena mori menjëherë distancë nga sjellja e tifozes së saj, duke e dënuar ashpër incidentin në një komunikatë zyrtare: “Jemi thellësisht të turpëruar dhe të shqetësuar për këtë ngjarje. E kuptojmë sa shumë e ka lënduar lojtaren e ofenduar. Nuk ka asnjë justifikim për atë që ndodhi dhe ne do të marrim masa ndaj prindërve për të siguruar që situata të tilla të mos ndodhin më. Ky është një veprim i rëndë dhe krejtësisht personal i një prindi, i cili nuk përfaqëson në asnjë mënyrë vlerat e klubit tonë”.
