40 të burgosur që vuanin dënimet për vepra të ndryshme penale në burgun e Durrësit janë zhvendosur në burgun e sigurisë së zakonshme në Fushë-Krujë.
Shkak për këtë zhvendosje është bërë përmbytja e ambienteve të brendshme të këtij burgu nga shirat e rëna pak ditë më parë.
Pas tranferimit të të dënuarve nga IEVP, ekipe të shumta nga emergjencat civile, zjarrëfiske dhe ujësjellësit kanë bërë të mundur largimin e ujit me pompa, ndërsa brenda ambienteve po punohet për pastrimin e tyre.
40 të burgosurit e transferuar në Fushë-Krujë do të qëndrojnë aty deri në vënien në funksion të ambienteve në Durrës.
Edhe pse reshjet e shiut kanë pushuar shumë banesa dhe objekte kanë prani të lartë uji në Durrës. Situata paraqitet e rënduar në ish-Kënetë Shkozet, Sukth, Katundi i Ri. Edhe IEVP Durrës ndodhet nën pushtetin e ujit. Pompa që është vënë në dispozicion për të tërhequr ujin dhe derdhur në pusetë aktualisht nuk po funksionon.
