Gjyqtarja Elsa Ulliri pranoi kërkesën për gjykim të shkurtuar nga 8 të pandehur të çështjes së inceneratorit të Tiranës. Konkretisht të ish-ministrit të mjedisit Lefter Koka, Erjon Murataj, Bledar Karoli, Taulant Tusha, Namik Simixhiu, Valbona Ballgjini, Sidita Kopliku dhe Jetmir Llapaj.
Ndërkohe 4 të tjerë Silena Tola, Etleva Kondi, Alba Thoma dhe Pëllumb Abeshi do të gjykohen me procedurë të zakonshme.
Në seancën e ardhshme, pritet që prokurori Dritan Prençi të japë konkluzionet për 8 të pandehurit, ndërkohë që për katër të tjerët do vijojë gjykimi.
Dosja e inceneratorit të Tiranës kaloi për gjykim në datë 13 dhjetor të vitit 2024. Në datë 2 gusht, Prokuroria e Posaçme njoftoi zyrtarisht mbylljen e hetimeve për 12 personat e akuzuar, nën dyshimin se kanë kryer veprën penale “shpërdorim detyre”.
Për inceneratorin e Tiranës, ish deputeti socialist Alqi Bllako njëherësh sekretar i përgjithshëm i ministrisë së mjedisit është ndarë më vete. Kjo për shkak se, Bllako akuzohet për një tjetër vepër penale, atë të korrupsionit.
Çështja ndaj tij është në fazën e dhënies së konkluzioneve nga ana e prokurorisë.
