Moti i keq në vendin tonë ka sjellë probleme në disa qytete. Ndër më të prekurit është Durrësi. Ministria e Mbrojtjes njofton se vijon puna për largimin e ujit nga zonat e prekura nga reshjet intensive të shiut. Problematika më të theksuara kanë rrugët dytësore në zonën e Durrësit të Ri, Shkozetit, Gjykata e Apelit, pjesërisht Zona e Plazhit. Ka prani të ujit në një numër të konsiderueshëm banesash dhe ambientesh publike. Ndërkohë është bërë evakuimi i disa familjeve.
Sipërfaqja e tokës bujqësore nën ujë llogaritet të jetë rreth 40 hektar. Ka një rritje të lehtë të niveleve të lumenjve Ishëm dhe Erzen, por pa rrezik për daljen nga shtrati.
Në terren janë të angazhuara forca nga MZSH, Autoriteti Portual, Bordi i Kullimit, ndërmarrjet e punëve publike të bashkisë. Në mbështetje të forcave në terren janë angazhuar 2 pompa thithëse dhe 3 kamionë të kalueshmërisë së lartë nga Forcat e Armatosura.
