Luis Enrique tërbohet, përjashton “biskotën” në Stuttgart-PSG: “Nuk do të spekulojmë”

Në prag të ditës së fundit të fazës së kampionatit të Champions League 2024-2025, dy gjigantë të futbollit evropian rrezikojnë eliminimin: Manchester City dhe PSG. Guardiola e di se nëse fiton kundër Bruges, shkon në playoff, ndërsa Luis Enrique e di se një barazim me Stuttgart do ta kualifikonte. Barazimi do të kënaqte edhe klubin gjerman. Një pikë për secilin dhe të dyja skuadrat kalojnë më tej. Disa dyshojnë për një “marrëveshje të heshtur”. Luis Enrique nuk e pranon një gjë të tillë dhe e thotë qartë se skuadra e tij do të luajë për të fituar në Gjermani.

Pse PSG dhe Stuttgart kualifikohen me një barazim?

Me 11 pikë, një skuadër siguron playoff-in. PSG dhe Stuttgart aktualisht kanë nga 10 pikë dhe përballen sonte. Prandaj, një barazim do t’i kualifikonte të dyja. Spekulimet rreth kësaj ndeshjeje janë të shumta, madje edhe bastvënësit në mbarë botën e shohin barazimin si rezultatin më të mundshëm.

Luis Enrique kërkon fitoren ndaj Stuttgart

Por këto zëra dhe aludime i shqetësojnë shumë trajnerët e të dyja skuadrave. Luis Enrique ishte i prerë dhe i drejtpërdrejtë në konferencën për shtyp të prag-ndeshjes. PSG dëshiron të vazhdojë rrugëtimin e tij dhe do të përpiqet ta bëjë këtë duke fituar, pa ndryshuar stilin e lojës apo mënyrën se si e interpreton futbollin: “Eksperienca më ka mësuar se kur nuk je i vetëdijshëm për atë që ndodh në fushë, nuk bën atë që duhet të bësh. Ne nuk do të spekulojmë me rezultatet e tjera. Do të luajmë njësoj. Do të përpiqemi të fitojmë për të rritur pikët dhe për t’u ngjitur në renditje.”

?️? Luis Enrique appeared in front of the media before #VFBPSG at the Stuttgart Arena ⤵️#UCL https://t.co/QLPWG1kq1e

— Paris Saint-Germain (@PSG_English) January 28, 2025

Hoeness nuk mendon për barazim: “Nuk di si të luaj për të barazuar”

Të njëjtin mendim ndan edhe trajneri i Stuttgart, Sebastian Hoeness, i cili në prag të ndeshjes tha se skuadra e tij do të kërkojë të fitojë për herë të tretë në këtë Champions League: “Nuk di si të luaj për të barazuar. Duam të përgatitemi sa më mirë për të zhvilluar lojën tonë. Logjikisht, ndaj një kundërshtari të këtij niveli, ndonjëherë do të na duhet të mbrohemi. Por pjesa tjetër e gjërave që thuhen nuk na interesojnë”.