Sipas rezultateve paraprake të Komisionit Qendror të Zgjedhjeve të Bjellorusisë, Alexander Lukashenko është rizgjedhur president në zgjedhjet e mbajtura dje, duke fituar një mandat të 7-të pesëvjeçar.
Sipas ‘exit polleve’ ai ka marrë 87.6% të votave, të dhëna këto nga sondazhet e një televizioni shtetëror bjellorus.
Rivali i tij më i afërt, Sergei Syrankov mori 3,21 për qind i ndjekur nga Oleg Gaidukevich me 2,02 për qind Anna Kanopatskaya me 1,86 për qind dhe Alexander Khizhnyak me 1,74 për qind.
Sipas ligjit bjellorus, një kandidat duhet të sigurojë mbi 50 për qind të votave për të fituar presidencën.
Komisioni zgjedhor pritet të publikojë rezultatet përfundimtare deri më 5 shkurt.
Rreth 6,9 milionë qytetarë kishin të drejtë të votonin në zgjedhje.
Sipas Igor Karpenko, kryetarit të komisionit, rreth 500 vëzhgues ndërkombëtarë u akredituan për të monitoruar votimin.
Mediat ndërkombëtare bënë të ditur se procesi u karakterizua nga mungesa e entuziazmit. Edhe vetë Lukashenko nuk ka qenë i pranishëm në fushatën elektorale përballë 4 rivalëve thuajse të panjohur, duke u justifikuar se ka qenë shumë i zënë me punët e qeverisjes së vendit.
Ai ka qenë në detyrë që kur fitoi zgjedhjet e para presidenciale të vendit në vitin 1994.
