Infarkti e privoi nga futbolli, Bove bën gjestin prekës: i vetëm në fushën e zbrazët

I gjithë stadiumi ishte tashmë i zbrazur pas fitores së Fiorentinës ndaj Lazios. Rreth e qark mbizotëronte heshtja, por në fushë papritmas u shfaq një figurë e vetmuar. Ishte Edoardo Bove, i cili në atë qetësi të thellë bëri një gjest krejt natyral, i shtyrë ndoshta nga nostalgjia dhe dëshira për t’u rikthyer të luante. Kur të gjithë ishin larguar, mesfushori hyri në heshtje në tapetin e gjelbër, bëri disa hapa drejt qendrës së fushës me duart në xhepa dhe më pas u kthye drejt dhomave të zhveshjes, me mendjen e mbushur me mendime të panjohura për të tjerët. Pamjet u regjistruan nga gazetarët e Passione Fiorentina, të cilët duke qëndruar më gjatë në tribunën e shtypit, mundën të shihnin nga afër lëvizjet e ish-lojtarit të Romës. Për një moment, Bove dukej sikur ishte sërish zotëruesi i stadiumit ku kishte luajtur kaq shumë ndeshje me fanellën verdhekuqe. Pas problemit shëndetësor që përjetoi gjatë ndeshjes ndaj Interit, Bove iu nënshtrua një operacioni për vendosjen e një defibrilatori nënlëkuror, një pajisje që sipas rregullave të Serie A nuk i lejon më të luajë.

Bove hyn në fushë i vetëm pas Lazio-Fiorentina

Futbollisti mendonte se askush nuk po e shikonte gjatë këtij rituali të heshtur. Teksa ecte në fushën pothuajse të zbrazët, dukej sikur dëshironte të ndjente edhe një herë emocionin e të qenit në atë ambient të dashur për të. Pas operacionit, ai nuk është lejuar më të luajë me Fiorentinën, megjithatë ka mundur të jetë në stol për të mbështetur shokët e skuadrës falë një leje të veçantë. Që nga rikuperimi i tij, Bove nuk e ka lënë asnjëherë ekipin vetëm, dhe pas fitores së djeshme ai u dorëzua për pak çaste nostalgjisë. Në qetësi të plotë, me gjithë skuadrën tashmë në dhomat e zhveshjes, mesfushori hyri në fushë siç kishte bërë qindra herë më parë, duke prekur të paktët njerëz të pranishëm. Më pas, me duart në xhepa dhe kokën ulur, ai u kthye te shokët e tij të skuadrës. Në atë moment, mendja e tij me siguri fluturoi drejt ditës kur më në fund do të mund të kthehet në fushë për të luajtur vërtet, jo më në vetminë e një stadiumi të zbrazët.

? Una scena bellissima, totalmente inaspettata. Mentre si registravo il video post partita, sul campo ritorna Bove, lo stadio è deserto, la partita è finita da un pò. Edo si gode il terreno dell'Olimpico in silenzio, per qualche minuto, da solo... Scena da brividi ? pic.twitter.com/4WlY5yCWjs

— Flavio Ognissanti (@Flavio_Ognissan) January 27, 2025