Brenda pak ditësh, Napoli i tij mposhti fillimisht Atalantën dhe më pas Juventus. Antonio Conte ndihet krenar për 6 pikë shumë të rëndësishme në garën për titull dhe nuk nguron të “heqë ndonjë gur nga këpuca”. Trajneri i skuadrës napolitane ka shfrytëzuar rastin për t’u rikthyer edhe te ndeshja kundër Atalantës në Bergamo, me një deklaratë që duket si një përgjigje për teknikun bergamask Gian Piero Gasperini.
Çfarë tha Conte pas Napoli-Juventus? Batuta ishte për Gasperinin
Në konferencën për shtyp, Antonio Conte u shfaq i kënaqur për atë që Napoli kishte arritur, jo vetëm kundër Juventusit. Ai iu referua edhe ndeshjes në Bergamo me këto fjalë plot krenari: “Të fitosh në fushën e Atalantës në atë mënyrë, për mua në mënyrë të drejtë, edhe pse dëgjova dikë që qante.” Kujt ia drejtoi fjalët trajneri salentin? Referenca duket se i drejtohet kolegut dhe rivalit të tij, Gasperinit, i cili pas ndeshjes së javës së kaluar nuk e pranoi lehtë humbjen.
Çfarë tha Gasperini?
Këto janë fjalët e tij që nuk kaluan pa u vënë re, duke nxitur përgjigjen e teknikut të Napolit Conte: “Bëmë një ndeshje të shkëlqyer kundër një kundërshtari të fortë, në disa momente ishte e jashtëzakonshme. Humbja e sotme na shqetëson, por na jep besim për ndeshjet e ardhshme. Disa ndeshje na japin forcë. Të luash kështu kundër Juventus dhe Napolit brenda tre ditësh, duke marrë vetëm një pikë… Me Juventus mund të kishim fituar sepse ata erdhën këtu vetëm për t’u mbrojtur. Me Napolin nuk morëm asnjë pikë, dhe kjo na shqetëson më shumë sesa ndeshja me Juventus, por ky është futbolli dhe në ndeshje të tjera kemi qenë më me fat me rezultatin.”
Conte e dallimet mes Napolit dhe ekipeve të mëdha të Serie A
Duke vazhduar më tej në deklaratën e tij, Conte foli edhe për dallimet mes Napolit dhe skuadrave të tjera të mëdha, duke dhënë atë që duket si një thumbim i radhës: “Ndonjëherë më vjen keq që nuk na njihen meritat, duket sikur gjithçka është e mirëkuptueshme. Ne duhet të qëndrojmë të heshtur, sepse e dimë që të tjerët gjithmonë duken më të bukur, më të parfumuar dhe më të rregulluar se ne në aspektin mediatik, dhe më pas zbulojmë që Napoli është një super skuadër.”
