Devyne Rensch sapo ka zhvilluar stërvitjen e tij të parë me fanellën e Romës. Ai vjen nga Ajax dhe, në moshën vetëm 22-vjeçare, realizoi ëndrrën e tij për të firmosur me një tjetër klub të madh në nivel botëror. Sigurisht, Ajax nuk është më pak i rëndësishëm kur bëhet fjalë për prestigj, por historia e këtij klubi është kryesisht e lidhur me lojtarë që rriten në akademinë e tyre dhe më pas shpërthejnë në ekipe të tjera, veçanërisht në vitet e fundit. Rensch është një prej tyre. Firma e kontratës, fanella verdhekuqe, takimi me Claudio Ranierin dhe më pas stërvitja e parë me emra të mëdhenj si Hummels, Paredes, Dybala dhe të tjerë.
Ndoshta ishte e tepërt për një djalë të moshës së tij, i cili nuk i mbajti dot lotët nga emocionet. Në një foto të publikuar nga agjenti i tij në rrjetet sociale, Rensch tregon të gjithë ndjeshmërinë e tij pasi hodhi firmën me Romën. Ai nuk i përmban dot lotët dhe përlotet në krahët e agjentit të tij, i cili i bëri një dedikim prekës: “Devyne, mbi të gjitha jam kaq krenar për personin që je. Një baba i shkëlqyer, djalë, vëlla dhe mik për të gjithë ne. Jam jashtëzakonisht mirënjohës që të kam në jetën time. Sido që të shkojë jeta, unë do të jem gjithmonë këtu për ty. E meriton këtë dhe më shumë. Tregoju atyre në Romë”.
Duket qartë se Rensch e ka dashur fort këtë transferim te Roma. Siç e shpjegoi edhe në intervistën e tij të parë për kanalet zyrtare të klubit verdhekuq: “Nuk gjej fjalët për të përshkruar sa i lumtur jam. Ky klub është i jashtëzakonshëm. Që në momentin e parë që më kontaktuan, mendova menjëherë ta pranoja,” – u shpreh ai. – “Është një klub i madh, ndiej një energji pozitive, më pëlqen gjithçka. Edhe ngjyrat janë shumë të bukura, qyteti… më mjaftoi vetëm një sekondë për të zgjedhur Romën”.
