Rrëmbimi i një vajze të sapolindur nga një spital në Kozenca të Italisë ka marrë vëmendje të veçantë në mediat e vendit fqinj. Ngjarja ndodhi pak ditë më parë kur një grua hyri në dhomën e nënës së re e veshur si infermiere dhe mori fëmijën me pretendimin se duhet ta shihte mjeku.
Pas disa minutash, kur vuri re se fëmija nuk po i kthehej nëna vuri alarmin. Policia e gjeti vajzën e mitur të veshur me rroba djemsh, në një makinë, në shoqërinë e një çifti të cilët u vunë në pranga.
Këtë premte ata dolën para gjykatës ku janë mësuar detaje të reja. Gruaja, Rosa Vespa ka marrë përsipër të gjithë krimin duke shfajësuar bashkëshortin e saj Aqua Moses, citon lapsi.al. Edhe vetë burri tha se nuk kishte dijeni për krimin dhe se për muaj të tërë gruaja e kishte mashtruar se ishte shtatzënë duke i treguar ekografi dhe analiza. Gjykatësi vendosi të lirojë burrin ndërsa gruaja mbeti në qeli.
“Ai është me të vërtetë i mërzitur nga e gjithë kjo çështje, por ka konfirmuar se nuk kishte vënë re asgjë. Gruaja i kishte treguar barkun. Ai e kuptoi që nuk ishte djali i tij vetëm kur ajo solli një vajzë në shtëpi dhe menjëherë pasi mbërriti policia”, - ka shpjeguar avokati i tij.
Gruaja ka thënë se ka falsifikuar shtatzëninë e saj për 9 muaj, madje ka mashtruar edhe bashkëshortin e saj duke sqaruar se nuk ka dashur të lëndojë askënd.
“Ishte një plan që rritej ditë pas dite. Nuk kisha një plan të saktë. U bllokova në një gënjeshtër që nuk mund ta përballoja. Nuk e di pse e bëra. Kishte shumë vite që kisha dëshirë për mëmësi. Nuk e kisha në plan ta rrëmbeja atë vajzën e vogël. Ishte një rastësi. Nuk dija më çfarë të bëja dhe hyra në atë dhomë. Isha e dëshpëruar sepse nuk dija si të dilja nga kjo situatë. Më vjen keq për atë që bëra dhe i kërkoj falje asaj nëne” – deklaroi ajo.
E pyetur për abortet e mëparshme që kishte deklaruar në polici, ajo shtoi: “Nuk kam humbur asnjë fëmijë. Edhe ato ishin gënjeshtra”. Për të bindur partnerin e saj se ishte shtatzënë dhe kishte sjellë në jetë djalin e tyre, ajo i tregoi burrit edhe një letër false të daljes nga spitali. ©LAPSI.al
