Afganët e mbetur në Shqipëri që pas tërheqjes së amerikanëve nga Afganistani para 4 vitesh nuk do të mund të vazhdojnë rrugëtimin e tyre drejt Shteteve të Bashkuara për një afat të pacaktuar.
Mes dhjetëra urdhërave ekzekutivë të nënshkruar nga Donald Tramp në ditën e parë të Presidencës së tij është edhe ai për pezullimin e fluturimeve të avionëve që tërheqin në Shtetet e Bashkuara, afganët të morën arratinë nga vendi i tyre në Gusht 2021 për t’i shpëtuar përndjekjes si bashkëpuntorë të amerikanëve, nga regjimi i sapoinstaluar i talebanëve.
Sipas CNN, urdhëri ekzekutiv i Trampit kërcënon të ardhmen e refugjatëve afganë që ndihmuan Shtetet e Bashkuara.
“Afganët që morën arratinë për t’i shpëtuar regjimit të talebanëve i bëjnë thirrje Trampit të heqë pezullimin e programit të refugjatëve”, shkruan Associated Press.
Ndërsa Fox News shkruan se “Urdhëri i Trump le në harresë mijëra aleatë afganë që presin shpërnguljen në SHBA”.
Urdhëri ekzekutiv ka një afat 90-ditor, por fati i tyre është i paqartë nisur edhe nga qasja e ashpër e Trampit ndaj emigrantëve.
Ministria e Jashtme Shqiptare, duke iu përgjigjur interesit të Televizionit Klan, shpjegoi se aktualisht në Shqipëri ndodhen vetëm imigrantë afganë që kanë marrë viza të posaçme për imigrantët, të cilët janë në një periudhë tranziti dhe qëndrojnë në vend për një kohë të kufizuar.
Ata qëndrojnë për një periudhë mesatare deri në 23 ditë, para se të vazhdojnë udhëtimin e tyre drejt Shteteve të Bashkuara. Numri i saktë i afganëve të mbetur në Shqipëri nuk bëhet i ditur. Pezullimi me afat 90-ditor prek drejtpërdrejt 1800 afganë, në listë për t’u tërhequr në Shtetet e Bashkuara gjatë këtyre 3 muajve.
Në vende të ndryshme të botës, në pritje janë në total 30 mijë. Shumica dërrmuese ndodhen në Pakistanin fqinj, ku gjetën strehë pasi morën arratinë nga talebanët. Deri më tani, në Shtetet e Bashkuara janë shpërngulur 180 mijë./Tv Klan
