Bypassi i Murrizit mbetet alternativa e vetme për qytetarët që duan të udhëtojnë nga Tirana në Qarkun Dibër nëpërmjet Rrugës së Arbrit.
News 24 njofton se ndërsa makinat shtetërore përdorin tunelin e Murrizit që është i pahapur për publikun, qytetarët janë të detyruar të përballen jo vetëm me terrenin malor në të cilin është bypassi por edhe me gjendjen e degraduar të tij. Gropat dhe deformimet janë prezente në të gjithë gjatësinë e këtij segmenti rrugor, ku veç të tjerash nuk ka hapësirën e mjaftueshme për të kaluar paralelisht dy automjete.
Drejtuesit e mjeteve thonë se e gjithë rruga është burim aksidenti nga prania e gropave, por edhe për shkak të trasesë së ngushtë në të cilën vështirë të ndërrohen dy automjete pa u ndalur njëra prej tyre. Ata kërkojnë që deri sa të hapet tuneli për qarkullimin e automjeteve, Bypassi të rregullohet pasi po rrezikojnë jetën sa herë kalojnë në këtë segment rrugor.
Për shkak të këtyre problematikave, thuajse çdo ditë në bypassin e Murrizit shënohen aksidente, të cilat fatmirësisht deri tani kanë qenë pa humbje jete njerëzore.
