Futbolli belg po përjeton një nga momentet më të vështira historike: Federata e Futbollit vendosi të bëjë një pastrim të plotë me një lëvizje të papritur duke shkarkuar trajnerin e kombëtares së meshkujve, Domenico Tedesco, dhe atë të kombëtares së femrave, Ives Serneels. Nëse për trajnerin italian largimi ishte i pritshëm pas më shumë se një viti në detyrë, për Serneels ishte një goditje e vërtetë e papritur: pas 14 vitesh në stol, ai u shkarkua me një telefonatë disa minutëshe.
Serneels ndodhej në Milano duke ndjekur Inter-Sassuolo
Vera e ardhshme do ta shohë kombëtaren belge të futbollit për femra, e njohur si “Flakët e Kuqe”, të marrë pjesë për herë të tretë radhazi në Kampionatin Evropian. Një arritje historike, e arritur nën drejtimin e Ives Serneels, trajnerit që bëri të mundur këtë sukses të pashembullt për Belgjikën. Megjithatë, ai nuk do të jetë në pankinë për të drejtuar ekipin në Zvicër. Pas sigurimit të kualifikimit përmes fitores në ndeshjet play-off kundër Ukrainës në fillim të dhjetorit dhe pavarësisht planifikimeve për turneun, ai nuk është më trajneri i skuadrës. Vetëm një ditë më parë, ai ndodhej në Milano për të ndjekur ndeshjen e Kupës së Italisë midis Interit dhe Sassuolos, duke vëzhguar pesë lojtare potenciale të kombëtares: Tessa Wullaert, Marie Detruyer, Kassandra Missipo, Davina Philtjens dhe Elena Dhont.
Shkarkimi i Serneels përmes një video-telefonate disa minutëshe
Vetëm 24 orë më vonë erdhi vendimi i papritur i Federatës: CEO i Federatës Belge të Futbollit, Peter Willems, realizoi një video-telefonatë me Serneels. Pas disa komenteve mbi lojtaret e vëzhguara, ai e informoi shkurtimisht për shkarkimin e tij me efekt të menjëhershëm. Më pas, Willems e komunikoi lajmin edhe stafit të kombëtares duke njoftuar zëvendësuesen e tij, Elisabet Gunnarsdottir. Vetëm pak më vonë, Federata Belge e Futbollit konfirmoi publikisht largimin e Serneels përmes një komunikate për shtyp.
Serneels, 14 vite në krye të kombëtares belge të femrave
Pas 14 vitesh në pankinë, Serneels u shkarkua me një telefonatë disa minutëshe, vetëm disa ditë pas largimit të Tedesco-s. Një vendim që duket se e ka mërzitur thellë trajnerin, pasi në deklaratën zyrtare të Federatës nuk u përfshi asnjë koment nga ana e tij. Karriera e tij në krye të kombëtares së femrave të Belgjikës, e cila e ngriti ekipin në skenën ndërkombëtare dhe siguroi tre kualifikime radhazi në Evropian, mori një fund të papritur.
