Dhjetëra mijëra policë, ushtarë dhe agjentë të FBI-së do të formojnë një "unazë çeliku" të padepërtueshme rreth Trump dhe liderëve botërorë në inaugurimin e Presidentit të ri amerikan.
Dy qendra komanduese të FBI-së, një re me dronë dhe 30 milje gardhe "të pakalueshme" do të forcojnë operacionin e sigurisë së kështjellës për shkak të kërcënimit nga terrorizmi. Duhet të jemi gati edhe për më “të keqen” thuhet nën zë nga autoritetet.
Të hënën, republikani do të bëjë betimin si presidenti i 45-të i Shteteve të Bashkuara. Trump njoftoi të premten se inaugurimi do të zhvendoset brenda për shkak të temperaturave të ftohta dhe të rrezikshme që kanë përfshirë Uashingtonin.
Ai do të bëjë betimin dhe më pas do të udhëheqë paradën brenda ndërtesës së Capitol Rotunda, siç bëri Ronald Reagan në 1985-ën ndërsa spektatorët do të jenë në gjendje të shikojnë ngjarjet që transmetohen drejtpërdrejt në Capital One Arena.
Gati 8 000 ushtarë janë dërguar në Uashington për të mbështetur forcën policore prej 25 000 trupash që rrethojnë Presidentin e zgjedhur, së bashku me anëtarët e Gardës Kombëtare nga çdo shtet amerikan.
Zyrtarët lokalë dhe federalë zbuluan se janë "të përgatitur" për më të keqen, pavarësisht se nuk kanë marrë kërcënime specifike kundër Presidentit të zgjedhur.
Një rreth i madh kamionësh plehrash, blloqe betoni dhe gardhe të zeza dy metra të larta do të krijojnë një bllokadë rreth zonës, më e gjata e ngritur ndonjëherë në Uashington.
Një pjesë e madhe e qytetit dy milje në të dyja anët e Shtëpisë së Bardhë do të jetë e mbyllur për trafikun.
Të pranishmit do të kalojnë nëpër pika kontrolli dhe do t'u nënshtrohen kontrolleve të ngjashme me ato në aeroporte. Lista strikte e artikujve të ndaluar përfshin laptopët, shkopinjtë për selfie, pankarta dhe madje edhe shishet e ujit.
Një kufizim i përkohshëm fluturimi është vendosur në qiejt mbi Uashington, duke hapur rrugën për një tufë dronësh survejimi që do t'u japin autoriteteve pamje nga lart.
Zyrtarët po përgatiten të mbrohen edhe kundër ndonjë sulmi të stilit “ujku i vetmuar” pas tentativave të shumta për vrasjen e Trump vitin e kaluar.
Në korrik 2024, Thomas Crooks qëlloi Donald Trumpin në vesh pasi u fsheh në një çati me pamje nga mitingu i ish-presidentit që mbahej në natyrë në Butler, Pensilvani. Kjo ndezi një mori tentativash të ardhshme për vrasje.
Komplotin i fundit i njohur u zbulua në nëntor të vitit të kaluar. Një seri sulmesh gjatë Vitit të Ri ndaj amerikanëve të zakonshëm ka rritur gjithashtu frikën për një sulm të mundshëm në inaugurim.
Në njërën prej këtyre sulmeve, 14 njerëz u vranë tragjikisht dhe dhjetëra u plagosën kur një veteran i ushtrisë amerikane përplasi një kamion në një turmë njerëzish që festonin në New Orleans.
Po atë ditë, një ushtar aktiv i ushtrisë amerikane shpërtheu një Tesla Cybertruck jashtë një hoteli të markës “Trump” në Las Vegas, duke vrarë veten.
Ndërkohë dy alarme sigurie ndodhën në Kapitol javën e kaluar duke i vënë zyrtarët në gatishmëri ultra të lartë.
Një burrë u arrestua duke u përpjekur të fuste brenda një hanxhar dhe tre thika në ndërtesën federale ndërsa një tjetër u kap duke ndezur një zjarr aty pranë.
Qindra mijëra mbështetës pritet të dynden në Kapitol të hënën për të marrë pjesë në festime.
Një numër i madh spektatorësh do të mblidhen në Capital One Arena për të parë transmetimin e drejtpërdrejtë të Trump duke bërë betimin brenda ndërtesës së Capitol Rotunda.
Rreth 70% e 34 500 dhomave të hoteleve të Uashingtonit u rezervuan për natën e inaugurimit dhe një natë më parë që nga java e kaluar. Inaugurimi i Joe Biden në vitin 2020 u ruajt gjithashtu shumë, pasi erdhi vetëm dy javë pas protestave të Kapitolit të 6 janarit, por turmat u rralluan për shkak të kufizimeve të vazhdueshme ndaj Covid.
Zyrtarët për ceremoninë e së hënës përballen me një numër shumë më të madh dhe një lloj krejtësisht të ri kërcënimi të sigurisë. Matthew Young, një agjent i Shërbimit Sekret, tha se operacioni i këtij viti duhej të planifikohej në vazhdën e sulmit në New Orleans. ©LAPSI.al
