Donald Trump do të shmangë burgun edhe pse gjykata e Nju Jorkut e shpalli fajtor çështjen e pagesës për aktoren e filmave për të rritur Stormy Daniels e cila duhet të heshte për raportin që kishte pasur me miliarderin. Ky është një vendim historik pasi për herë të parë dënohet për një vepër penale një person i zgjedhur President i SHBA-ve dhe vendimi vjen vetëm pak javë përpara se të kthehet në Shtëpinë e Bardhë.
Gjykatësi Juan Merchan dha një dënim me "lirim të pakushtëzuar", që do të thotë se presidenti i zgjedhur nuk do të paguajë ndonjë gjobë, nuk do të kryejë burg dhe nuk do të jetë nën mbikëqyrje me kusht. Thjesht ky vendim e bën Trump një kriminel të dënuar. Trump u shpall fajtor më 30 maj 2024 për falsifikimin e të dhënave të biznesit me qëllimin fshehjen e parave që do të shkonin për aktoren.
Zyra e prokurorit të qarkut të Manhatanit argumentoi se Trump falsifikoi bilancet me anë të ish-avokatit të tij Michael Cohen për pagimin e 130 mijë dollarëve yllit të filmave porno. Trump i deklaroi këto pagesa si "shpenzime ligjore" në dokumentet financiare.
Në këtë mënyrë Trump, inaugurimi presidencial i të cilit është planifikuar për në 20 janar bëhet presidenti i parë i SHBA-së, “ish” ose në detyrë që përballet me një gjyq penal dhe që për më tepër merr një vendim fajësie. Duke iu drejtuar gjykatës me anë të videos online pak para dhënies së dënimit, Trump e quajti rastin "një përvojë shumë të tmerrshme", një "padrejtësi" dhe një "gjueti shtrigash politike".
“Më paditen për të dhënat e biznesit? Të gjithë janë kaq të saktë. Ka qenë një gjueti shtrigash politike... për të dëmtuar reputacionin tim në mënyrë që të humbisja zgjedhjet. Është e qartë se kjo nuk funksionoi” – tha Trump.
Pas përfundimit të seancës, ai vijoi komentet në mediat sociale, duke shkruar në Truth Social, “Juria e vërtetë, populli amerikan, ka folur, duke më rizgjedhur me një MANDAT dërrmues në një nga zgjedhjet më të rëndësishme në histori”.
Jashtë gjykatës u mblodhën mbështetës të Trump dhe protestuesit anti-Trump. Disa protestues mbanin pankarta ku shkruhej "Trump është fajtor", "Mashtrues" dhe "34 dënime për krime", ndërsa mbështetësit e tij shfaqën një pankartë ku shkruhej "Ndaloni komplotin partizan; ndaloni gjuetinë politike të shtrigave”. ©LAPSI.al
