Një 28-vjeçar është arrestuar nga policia e kryeqytetit si i dyshuar për posedimin dhe shitjen e lëndëve narkotike.
Gjatë ndërhyrjes, shtetasi J. Sh., 28 vjeç, tentoi të shpërbënte një dozë kokaine sapo vërejti forcat e Policisë. Pas kontrollit fizik dhe atij në banesën e tij, u sekuestruan doza të lëndës narkotike kokainë dhe rreth 800 gramë lëndë narkotike të dyshuar cannabis sativa.
Operacioni, i realizuar nga Seksioni për Hetimin e Narkotikëve në bashkëpunim me Komisariatin e Policisë Nr. 6, u zhvillua pas sigurimit të informacioneve operative se në rrugën “Bakalli” një person shiste doza kokaine.
Policia vazhdon hetimet për të identifikuar dhe arrestuar persona të tjerë të përfshirë në këtë veprimtari kriminale. Materialet procedurale janë referuar Prokurorisë pranë Gjykatës së Shkallës së Parë Tiranë, për veprën penale “Prodhimi dhe shitja e narkotikëve”.
