Prokuroria e Posaçme ka përfunduar hetimet për 17 personat e përfshirë në kultivimin e kanabisit në sera në fshatin Drenovicë të Beratit. SPAK ka dërguar për gjykim 17 persona në GJKKO ditën e sotme, ndërkohë që ka shpallur moskompetencë për 93 gra të përfshira si punëtore në këtë aktivitet.
Në njoftimin e tij, SPAK ka zbuluar dhe rolin e secilit prej anëtarëve të këtij grupi që drejtohej nga Blerim Xheka e Sadetin Hasaj. Prokuroria thekson se organizimi, drejtimi dhe financimi i “Prodhimit dhe shitjes së narkotikëve”, organizimi, drejtimi dhe financimi i “Kultivimit të bimëve narkotikëve”, “Mbajtja pa leje dhe prodhimi i armëve, armëve shpërthyese dhe i municionit”, bëhej nga të pandehurit Blerim Xheka e Sadetin Hasaj.
Ndërsa aktiviteti i “Prodhimit dhe shitjes së narkotikëve dhe i “Kultivimit të bimëve narkotike” ushtrohej dhe mbikqyrej njëherazi nga të pandehurit; Sidrit Bisha, Endriol Xheka, Jurgen Ujkaj, Suad Smakaj, Samoel Lushaj e Mirvaldo Disha. Anëtarët e tjerë të grupit Blerim Xheka, Sadetin Hasaj, Sidrit Bisha, Jurgen Ujkaj, Hamdi Dyli dhe Samoel Lushaj mbanin dhe armë pa leje në mbrojtje të ushtrimit të aktivitetit të paligjshëm.
Ndërsa aktiviteti i “Kultivimit të bimëve narkotikëve” në kuadër të “Grupit të Strukturuar Kriminal” ushtrohej kryesisht nga të pandehurit; Hamdi Dyli, Arben Vrapi, Adiol Çifliku, Lulzim Bushataj, Mustaf Manej, Bashkim Mema, Edison Mema, Drita Mema dhe Izmire Mema.
