Shqiptarët po rikthehen në atdhe për të kaluar festat e fundvitit. Mëngjesin e sotëm me tragetin e linjës Vlorë-Brindisi kanë mbërritur 1,015 pasagjerë dhe 176 automjete në portin e Vlorës. Qyteti bregdetar po përjeton fluksin e emigrantëve dhe turistëve në prag të festave të fundvitit, teksa autoritet portuale kanë marrë masat.
Mësohet se autoritetet kanë shtuar sportelet për të përballuar fluksin e madh të udhëtarëve, i cili pritet të rritet edhe më shumë në ditët në vijim.
Ndërkohë ajo që bëhet e ditur nga autoritetet doganore është se fluksi më i lartë pritet të regjistrohet në Vigjilje të Krishtlindjes e më pas në ditët e fundit të vitit.
Mbërritjet shënojnë një intensifikim të lëvizjeve në prag të festave të fundvitit, kur emigrantët rikthehen për të kaluar kohë me familjet e tyre dhe turistët zgjedhin të vizitojnë bregdetin shqiptar për pushime.
