Grupi Parlamentar i PD ka depozituar 34 amendamente për buxhetin e 2025. Kryetari i grupit parlamentar të PD-së Gazment Bardhi thotë se 34 amendamentet e PD sigurojnë mirëqenien minimale të qytetarëve.
Përmes një postimi në Facebook ku ka renditur 34 amendamentet e PD, Bardhi thotë se “Buxheti i Shtetit i miratuar nga mozharonca ka prioritet financimin e aferave korruptive”.
“Me qëllim që Buxheti i Shtetit 2025 të mos jetë Buxheti i mirëqenies së Edi Ramës dhe një grushti njetëzish pranë tij, por të jetë Buxheti i qytetarëve dhe që siguron mirëqenien minimale të tyre, Grupi Parlamentar i Partisë Demokratike ka depozituar 34 amendamente”, shkruan Bardhi ne Facebook.
Kujtojmë se buxheti 2025 u miratua në parim më 19 nëntor. Pas një seance maratonë e cila u zhvillua për dy ditë në Kuvend, ku pati mjaft debate dhe diskutime nga opozita dhe mazhoranca, Kuvendi miratoi me 75 vota pro buxhetin 2025.
Projektligji për buxhetin e vitit 2025, i cili kërkon shumicë të thjeshtë votash, u miratua me 75 vota pro të mazhorancës, 40 vota kundër të opozitës dhe 0 abstenim.
Deputetët e opozitës kundërshtuan buxhetin e 2025, duke thënë se ai nuk reflekton nevojat reale të qytetarëve.
