Vendimi i Presidentit Biden për të lejuar Ukrainën të godasë brenda Rusisë me raketa me rreze të gjatë të furnizuara nga SHBA-ja ka sjellë një reagim të furishëm në Rusi.
“Presidenti në largim i SHBA-së, Joe Biden… ka marrë një nga vendimet më provokuese, të pallogaritura të administratës së tij, që rrezikon pasoja katastrofike”, thuhet në faqen e internetit të gazetës qeveritare ruse Rossiyskaya Gazeta të hënën në mëngjes.
Deputeti rus Leonid Slutsky, kreu i Partisë Liberal-Demokratike pro-Kremlinit, parashikoi se vendimi "do të çonte në mënyrë të pashmangshme në një përshkallëzim serioz, duke kërcënuar me pasoja të rënda".
Senatori rus Vladimir Dzhabarov e quajti atë "një hap të paprecedentë drejt Luftës së Tretë Botërore".
E vertetë që ka zemërim, por nuk është se ka ndonjë surprizë.
Komsomolskaya Pravda, tabloidi pro-Kremlinit, e quajti atë "një përshkallëzim të parashikueshëm".
Megjithatë, ajo që ka vërtet rëndësi është mënyra si Vladimir Putin e sheh këtë vendim dhe si do të përgjigjet lideri i Kremlinit.
Deri më tani ai ka heshtur.
Lexo më tej: Biden firmos: Ukraina mund të përdorë armët tona me rreze të gjatë brenda Rusisë
Por të hënën, zëdhënësi i presidentit Putin, Dmitry Peskov u tha gazetarëve se “nëse një vendim i tillë është marrë, do të thotë një spirale e re tensioni dhe një situatë krejtësisht e re në lidhje me përfshirjen e SHBA-së në këtë konflikt."
Peskov akuzoi administratën Biden se "i ka hedhur benzinë zjarrit dhe ka vazhduar të nxisë tensionin rreth këtij konflikti".
Udhëheqësit perëndimorë do të argumentonin se është Rusia ajo që po i hedh benzinë zjarrit duke vendosur së fundmi trupa të Koresë së Veriut në zonën e luftës për të luftuar përkrah forcave ruse dhe duke vazhduar të sulmojë Ukrainën.
Vetë presidenti Putin mundet që të bëjë ndonjë koment. Por presidenti rus, më parë, ka thënë shumë.
Në muajt e fundit, Kremlini ia ka bërë të qartë mesazhin Perëndimit: mos e bëni këtë, mos hiqni kufizimet në përdorimin e armëve tuaja me rreze të gjatë, mos lejoni që Kievi të godasë thellë në territorin rus me këto raketa.
Në shtator, presidenti Putin paralajmëroi se nëse kjo do të lejohej të ndodhte, Moska do ta konsideronte atë si "pjesëmarrje të drejtpërdrejtë" të vendeve të NATO-s në luftën e Ukrainës.
"Kjo do të thotë se vendet e NATO-s... po luftojnë me Rusinë," vazhdoi ai.
Muajin pasues, udhëheqësi i Kremlinit njoftoi ndryshimet e afërta në doktrinën bërthamore ruse, dokumenti që përcakton parakushtet nën të cilat Moska mund të vendosë të përdorë një armë bërthamore.
Kjo u interpretua gjerësisht si një tjetër aluzion më pak se delikate për Amerikën dhe Evropën për të mos lejuar Ukrainën të godasë territorin rus me raketa me rreze të gjatë.
Të hamendësosh lëvizjet e ardhshme të Vladimir Putin nuk është kurrë e lehtë.
Por ai ka hedhur aludime.
Lexo më tej: Efekti Trump/ Scholz telefonon Putinin, pas dy vitesh heshtje
Në qershor, në një takim me krerët e agjencive ndërkombëtare të lajmeve, Putin u pyet: si do të reagonte Rusia nëse Ukrainës do t'i jepej mundësia të godiste objektivat në territorin rus me armë të furnizuara nga Europa?
"Së pari, ne, sigurisht, do të përmirësojmë sistemet tona të mbrojtjes ajrore. Ne do të shkatërrojmë raketat e tyre," u përgjigj Presidenti Putin.
“Së dyti, ne besojmë se nëse dikush mendon se është e mundur të furnizohen me armë të tilla në një zonë lufte për të goditur territorin tonë dhe për të krijuar probleme për ne, pse nuk mund të furnizojmë armët tona të së njëjtës klasë në ato rajone anembanë botës ku ata do të synojnë objektet e ndjeshme të vendeve që po ia bëjnë këtë Rusisë?"
Me fjalë të tjera, armatosja e kundërshtarëve të perëndimit për të goditur objektivat perëndimore jashtë vendit është diçka që Moska e ka marrë në konsideratë.
(Presidenti Biden i ka dhënë Ukrainës lejen për të përdorur raketat ATACMS, të parë këtu gjatë stërvitjeve ushtarake Koreja e Jugut-SHBA, për të goditur brenda Rusisë)
Në një intervistë të fundit të BBC me Aleksandër Lukashenkon, liderin e Bjellorusisë, aleati i ngushtë i Putinit dukej se konfirmoi se Kremlini ka menduar në këtë drejtim.
Lukashenko tha se kishte diskutuar këtë temë në një takim të fundit me zyrtarë perëndimorë.
"Unë i paralajmërova ata. 'Djema, kini kujdes me ato raketa me rreze të gjatë'," tha zoti Lukashenko.
“Rebelët Houthi mund të vijnë te Putini dhe të kërkojnë sisteme të armëve bregdetare që mund të kryejnë sulme të tmerrshme mbi anijet.
"Dhe nëse ai hakmerret ndaj jush për furnizimin e armëve me rreze të gjatë për [Presidentin] Zelensky duke furnizuar Houthis me sistemin raketor Bastion? Çfarë ndodh nëse goditet një aeroplanmbajtëse? Një britanike apo amerikane. Çfarë ndodh atëherë?"
Por disa nga reagimet e mediave në Rusi u dukën si të krijuara për të minimizuar gjërat.
“Forcat e armatosura ruse kishin përgjuar tashmë raketat ATACMS gjatë sulmeve në bregun e Krimesë”, tha një ekspert ushtarak për gazetën Izvestia, e cila vazhdoi të sugjeronte se presidenti i zgjedhur Trump mund të “rishikonte” vendimin.
Kjo është, për ta thënë butë, një situatë e pazakontë.
Pas dy muajsh, Presidenti Biden do të jetë jashtë detyrës dhe Donald Trump do të jetë në Shtëpinë e Bardhë.
Kremlini e di se Presidenti i zgjedhur Trump ka qenë shumë më skeptik se Presidenti Biden për ndihmën ushtarake për Ukrainën.
A do të jetë ky një faktor në llogaritjet e Vladimir Putin ndërsa ai formulon përgjigjen e Rusisë?
BBC, përshtati në shqip ©LAPSI.AL
