Lufta në Ukrainë shënon një tjetër ngjarje të rëndësishme. Administrata e Presidentit amerikan Joe Biden do të lejojë Kievin të përdorë armët e dërguara nga SHBA për të goditur thellë në territorin rus. Lajmi është publikuar nga agjencitë më të mëdha amerikane Reuters, New York Times dhe Associated Press që cituan burime në dijeni të kësaj çështjeje dhe duke e konsideruar një ndryshim të rëndësishëm në politikën e Uashingtonit në konfliktin Ukrainë-Rusi.
Ukraina planifikon të kryejë sulmet e saj të para me rreze të gjatë në ditët në vijim, thanë burimet, pa zbuluar detaje për shkak të shqetësimeve të sigurisë operacionale. Shtëpia e Bardhë nuk ka pranuar ende të komentojë lajmin.
Lëvizja e Shteteve të Bashkuara dy muaj përpara se presidenti i sapozgjedhur Donald Trump të marrë detyrën më 20 janar, vjen pas kërkesave disamujore të presidentit ukrainas Volodymyr Zelenskiy për të lejuar ushtrinë e Ukrainës të përdorë armët amerikane për të goditur objektivat ushtarake ruse larg kufirit të saj.
Ndryshimi vjen pas vendosjes së trupave tokësore të Koresë së Veriut nga Rusia për të plotësuar forcat e veta, një zhvillim që ka shkaktuar alarm në Uashington dhe Kiev. Sulmet e para përtej kufirit rus ka të ngjarë të kryhen duke përdorur raketa ATACMS, të cilat kanë një rreze veprimi deri në 190 milje (306 km), sipas burimeve.
Disa zyrtarë amerikanë kanë shprehur skepticizëm se lejimi i sulmeve me rreze të gjatë do të ndryshojë trajektoren e përgjithshme të luftës, vendimi mund të ndihmojë Ukrainën në një moment kur forcat ruse po bëjnë përparim dhe ndoshta kjo do ta vendosë Kievin në një pozicion më të mirë negociues kur edhe nëse ndodh që të nisin bisedimet për armëpushim.
Nuk është e qartë nëse Trump do të ndryshojë vendimin e Biden kur të marrë detyrën. Trump ka kritikuar prej kohësh shkallën e ndihmës financiare dhe ushtarake të SHBA-së për Ukrainën dhe është zotuar të përfundojë shpejt luftën, pa shpjeguar se si.
Megjithatë, disa republikanë të Kongresit i kanë kërkuar Biden që të ndryshojë rregullat se si Ukraina mund të përdorë armët e ofruara nga SHBA. Rusia ka paralajmëruar se nëse lehtësohen kufizimet në përdorimin e armëve amerikane nga Ukraina do të ishte një përshkallëzim i madh i konfliktit. ©LAPSI.al
