Në konferencën e tij me gazetarët, kryetari i Partisë Demokratike, Sali Berisha ka reaguar lidhur me vrasjen që tronditi Tiranën, mbrëmjen e të mërkurës. Berisha u shpreh se Reçi, për të cilin tha se ishte një ish-punonjës i përgjegjshëm Shërbimit Informativ, nuk figuronte në asnjë lloj implikimi e problematike. Sipas tij edhe kjo vrasje do të ngelet po ashtu pa autor.
“Dënoj vrasjen e biznesmenit Reçi. Ish-punonjësi, ish-oficeri i përgjegjshëm i SHISH, për të cilin nuk figuron asnjë lloj implikim e problematike, një vrasje mafioze e shtetit mafioz dhe si çdo vrasje tjetër mbetet pa autor dhe pa zbuluar”, tha Berisha.
Sot janë zbardhur detaje të reja nga vrasja e biznesmenitEduart Reçi, ku bëhet me dije se në momentin që ndodhi atentati janë dëgjuar shpërthime fishekzjarresh në distancë të afërt, të cilat dyshohet se janë përdorur për të kamufluar të shtënat e armës. Gjithashtu raportohet se viktima ka qenë në sheshin e pallatit me bashkëshorten duke pastruar ambientin poshtë, dhe ka hyrë e dalë disa herë në pallat. Sipas informacioneve, në një moment që ka dal jashtë dhe kur zhurma e fishekzjarreve kishte nisur, Eduart Reçi është rrëzuar dhe ka rënë në tokë. Bashkëshortja e tij fillimisht ka menduar se ai është lënduar në kokë nga fishekzjarret duke mos kuptuar se ishte plumb. Nga hetimet e deri tanishme dyshohet se distanca nga është qëlluar mund të jetë nga 20 deri ne 30 metra, por akoma e papërcaktuar se nga çfarë arme, dyshohet ndonjë prodhim i viteve të fundit dhe i panjohur. Ndërkohë, kamerat e sigurisë po këqyren në distancë.
