"Përmbushjen e një misioni si amanet", kështu e ka quajtur Edlira Çepani rikthimin e saj në punë pas ndarjes nga jeta të bashkëshortit të saj, Gerti Bogdani. Përmes një postimi në rrjetet sociale, aktivistja e njohur ka bërë me dije se është riktyer në punë dhe aktivitetet e saj.
Ajo ka ndarë disa foto me ndjekësit e saj, teksa ndodhet në qytetin Chisinau të Moldavisë. Aktivistja tregon se ndodhet atje teksa ka zhvilluar një takim me të rinj nga Europa Lindore, me të cilët kanë trajtuar tema frymëzimi, për të gjetur forcën për të ecur përpara në mes të vështirësive dhe fatkeqësive.
“Në përpjekjen e mundimshme për të rifilluar angazhimet në përmbushjen e një misioni si amanet, rrugëtova drejt Chisinau. Aty pata fatin të njihja e të frymëzohesha nga të rinj nga 3 shtete të Europës Lindore, të cilët më treguan kaq bukur, se në mes të fatkeqësive e luftërave si ajo në Ukrainë (dhe sirenave të bombardimeve që u bien atyre dhe familjeve të tyre kohë e pa kohë), në mes të vështirësive që ata përjetojnë çdo ditë, sërish gjejnë forcën për të ecur përpara dhe për të luftuar për një botë më të mirë”, ka shkruar Çepani krahas fotove.
Gerti Bogdanit u nda nga jeta paraditen e 18 shtatorit teksa ndodhej në ambientet e Hotel “Rogner” në kryeqytet, nën shoqërinë e kolegëve dhe miqve të tij, gati për të marrë pjesë një takim zyrtar. Fatkeqësisht, 44-vjeçari pësoi një goditje të papritur në zemër. Edhe pse u dërgua menjëherë me autoambulancë në spital, mjekët nuk arritën ta shpëtonin.
