Duke nisur nga e hëna, autoritetet italiane do të rinisin sërish operacionin për akomodimin e emigrantëve të paligjshëm në kampin e Gjadrit në Lezhë. Corriere della Sera shkruan se anija e marinës italiane “Libra” do të marrë refugjatët e shpëtuar në Mesdhe dhe për t’i sjellë më pas ata që janë të përshtatshëm në portin e Shëngjinit, deri në shqyrtimin e kërkesës së tyre për azil. Operacioni për sjelljen e tyre nga Italia në Shqipëri, u bllokua pas një vendimi të gjykatës së Romës. Kjo detyroi autoritetet të kthenin sërish në vendin fqinj 14 emigrantët që u akomoduan në kampin e Gjadrit.
Qeveria Meloni miratoi një dekret duke përditësuar listën e vendeve të sigurta, duke i dhënë zgjidhje bllokimit të operacioneve për sjelljen e emigrantëve ilegalë. Deri tani autoritetet ende nuk kanë bërë zyrtare numrin e emigrantëve që pritet të mbërrijnë në tokën shqiptare.
