Ish-ministri Saimir Tahiri u paraqitet sot në Prokurorinë e Posaçme për t'u marrë në pyetje si person që ka dijeni lidhur me dosjen e 21 janarit. Tahiri u paraqit në SPAK rreth orës 09:30 dhe qëndroi për gati 1 orë.
"U pyeta për 21 janarin. Dhashë sqarime si protestues dhe për kallëzimin që kam bërë në vitin 2015", tha ai për gazetarët.
Hetimi për çështjen “21 janari” u regjistrua në SPAK në korrikun e këtij viti, në zbatim të një vendimit të Gjykatës së Lartë. Për këtë, SPAK ka nisur veprimet duke marrë në pyetje disa ish-funksionarë të lartë të Policisë. Konkretisht, janë thirrur ish-drejtori i Përgjithshëm i Policisë, Hysni Burgaj dhe ish-zv.drejtori Agron Kuliçaj. Ditën e enjte në SPAK ishte dhe deputeti i PS, Xhemal Qefalia, i cili u pyet nga prokurorët në cilësinë e personit që ka dijeni për 21 janarin.
