Deputetja e PD-së Ina Zhupa ka depozituar sot në SPAK një padi për ligjin e qeverisë që ul nivelin e mbrojtjes për Zonat e Mbrojtura. Padia e firmosur nga 37 deputetë të PD-së kërkon rrëzimin e ligjit për Zonat e Mbrojtura.
Duke folur për mediat, Zhupa tha se ky ligj zgjidh vetëm problemin e oligarkëve dhe sipas saj, sot praktikisht nuk ka më zona të mbrojtura. Zhupa tha se ligji për Zonat e Mbrojtura nuk i shërben interesit publik, pasi është në shkelje të Kushtetutës dhe në kundërshtim me konventat ndërkombëtare.
"Ky ligj nuk i shërben interesit publik dhe është në shkelje të kushtetutës dhe konventave ndërkombëtare. Ligji mbron vetëm interesin e Ramës dhe miqve të tij, si mbrohet interesi publik kur në vend të një prone publike do të bëhet pronë private për oligarkët. Pra mbrojtja do të jetë vetëm në letër, kur në vend të një lagune do të jetë pishina private e një kompleksi vilash, ku në vend të mjedisit të mrekullueshëm do të keni beton dhe vilat e oligarkëve. Ligji nuk i shërben interesin publik. Janë 37 deputetë që kanë firmosur dhe janë bërë pjesë e kësaj padie. Ne do të dorëzojmë sot padinë. Padisë do i bashkohen dhe organizatat e shoqërisë civile.", tha Zhupa.
