Detaje të reja janë zbardhur në lidhje me plagosjen në Torovicë të Lezhës. Në lidhje me ngjarjen ka reaguar policia e Lezhës e cila ka dalë me një njoftim zyrtar.
Sipas poliicsë ngjarja ka ndodhur rreth orës 17:35, në Balldre, ku si pasojë e një konflikti për motive të dobëta është dëmtuar me kosor 47-vjeçari me inicialet L. M.
I plagosur po merr mjekim në spital dhe ndodhet jashtë rrezikut për jetën. Ndërkohë mësohet se 47-vjeçari është plagosur nga dy persona, babë e bir. Ata janë identifikuar si Sokol Boga, dhe djali i tij, Nikolin Boga. Po ashtu, gjatë konfliktit fizik mes tyre ka mbetur i lënduar dhe ky i fundit, i cili pas ndihmën mjekësore do shoqërohet në Komisariat për veprime të mëtejshme. Ndërkohë policia bën me dije se po vijojnë kontrollet për kapjen Sokol Bogës.
Njoftimi i policisë:
Lezhë/Informacion paraprak. Rreth orës 17:35, në Balldre, Lezhë, si pasojë e një konflikti për motive të dobëta është dëmtuar me një mjet prerës(kosor), shtetasi L. M., 47 vjeç, i cili po merr mjekim në spital dhe ndodhet jashtë rrezikut për jetën.
Nga veprimet e para hetimore të kryera nga grupi hetimor dyshohet se 47 vjeçari është goditur nga shtetasit S. B., dhe djali i tij shtetasi N. B., gjatë konfliktit fizik mes tyre. Po nga konflikti është dëmtuar lehtë dhe shtetasi N.B, i cili pas ndihmën mjekësore do shoqërohet në Komisariat për veprime të mëtejshme.
Gjithashtu po nga veprimet e para hetimore dyshohet se këta shtetas kanë thyer dhe xhamin e parë të automjetit në pronësi të 47 vjeçarit. Grupi hetimor ndodhet në vendngjarje dhe vijon punën për sqarimin e rrethanave dhe dokumentimin ligjor të rastit. Ndërkohë shërbimet e Policisë vijojnë kontrollet për kapjen e shtetasit S.B.
