Digjet plotësisht një banesë në fshatin Dervician të bashkisë së Dropullit, në Gjirokastër.
Në vendngjarje ka shkuar një automjet zjarrfikës dhe pavarësisht përpjekjeve, zjarri kishte marrë përmasa dhe rrezikonte banesat përreth saj.
Vatra u shfaq gjatë orëve të natës. U kërkua për të ardhur në ndihmë edhe automjeti i dytë zjarrfikës autobot, me dy efektivë të tjerë. Pasi u luftua me flakët dhe u izolua zjarri, u shmang edhe përfshirja e banesave të tjera.
Banesa është në pronësi të Grigor Çurit, familja e të cilit tashmë mbetet në qiell të hapur, pasi objekti u dogj plotësisht në një orë dhe dëmet materiale janë të konsiderueshme. Policia vendore po heton për shkaqet dhe rrethanat e ngjarjes.
