Grupi Parlamentar i PD-së ka paditur në Prokurorinë e Posaçme deputetin socialist Plarent Ndrecën, pasi mori drejtimin e Komisionit Hetimor në Shëndetësi dhe nuk lejoi opozitën të merrte pjesë në mbledhje. Gjithashtu grupi i PD-së ka kallëzuar edhe sekretarin e Kuvendit, Genc Gjonçaj dhe punonjës të Gardës.
Bëhet fjalë për Komisionin Hetimor për Check up dhe Sterilizimin të datës 8 Tetor, ku drejtimin e mbledhjes e mori nënkryetari Ndreca, ndërsa kryetarja Albana Vokshi nuk ishte e pranishme në sallë.
I thirrur për t’u marrë në pyetje në seancën dëgjimore ishte Arben Gjata. Kujtojmë që Plarent Ndreca ka qenë avokat i dëshmitarit Arben Gjata për çështjen e “Sterilizimit”. Duke vlersuar situatën Partia Demokratike i ka drejtuar një kërkesë kryetares së Sekretariatit të Etikës ku thekson;
“Komisioni Hetimor ndodhet në një situatë të paprecedent, të pandodhur asnjëherë më parë në historinë e Komisioneve Hetimore. Mbi 70% e anëtarëve aktualisht janë të dënuar e nuk lejohen që të hyjnë e të marrin pjesë në mbledhjet e Komisionit”, thuhet në shkresë.
Në kërkesë thuhet se pamundësia e deputetëve të opozitës për të marrë pjesë në Komision, e bën pyetjen e dëshmitarëve të paplotë dhe të pavlefshme. Gjithashtu argumentohet se deputetë të mazhorancës kanë përdodur një fjalor jo të denjë dhe jo etik ndaj një ligjvënësje të PD-së.
“Përdorimi nga disa deputetë pjesë të mazhorancës i një fjalori i padenjë dhe joctik ndaj një zonje deputete, e cila në rradhë të parë është një nënë dhe një grua, vlerësojmë se përben shkelje të rëndë të etikës parlamentare”.
