Cameron Diaz ka zbuluar së fundmi një ndër arsyet që e bindën të rikthehej në aktrim dhe bëhet fjalë për bashkëshortin e saj, Benji Madden.
“Ai është më i miri”, u shpreh aktorja gjatë samitit “Fortune’s Most Powerful Women”.
Diaz do të rikthehet me 2 filma: “Back in Action” dhe “Shrek 5”. Filmi i saj i fundit ishte “Annie” dhe më pas, ajo u përqendrua te familja . Në vitin 2015, Diaz u martua me Madden dhe 4 vite më vonë, erdhi në jetë e bija e tyre, Raddix. Në mars të 2024-ës, çifti njoftoi lindjen e djalit të tyre, Cardinal.
Duke reflektuar për kohën e saj larg, Diaz tha: “Ne ishim në shtëpi për një kohë të gjatë, gjë që ishte e mahnitshme. Por, më duhej të shtyja veten.”
Sipas revistës People, ajo theksoi se Madden e inkurajoi të ndiqte pasionet e saj, duke thënë: “Ti na ke mbështetur për të ndërtuar këtë familje dhe në sipërmarrjet e mia. Tani është momenti që ta lëmë mamin që të bëjë gjënë e vet”, referuar rikthimit të saj në aktrim.
Cameron e përshkroi pauzën e saj si një periudhë të nevojshme për rritjen personale, duke thënë: “Ndjehej si gjëja e duhur për të rifituar jetën time dhe thjesht nuk më interesonte asgjë tjetër. Mendimi i askujt, suksesi i askujt, oferta e askujt, asgjë e askujt nuk mund të më ndryshonte mendjen për vendimin tim për t'u kujdesur për veten dhe për të ndërtuar jetën që vërtet doja të kisha."
