Ellen DeGeneres zbuloi se është diagnostikuar me osteoporozë, OCD (çrregullim obsesiv-kompulsiv) dhe ADHD (çrregullim i deficitit të vëmendjes/hiperaktivitetit).
Fituesja e çmimit Emmy foli për problemet e fundit mbi shëndetin e saj ndërsa diskutonte mbi moshën në një komedi me titull "For Your Approval", që u shfaq në Netflix këtë javë.
“Unë as nuk e di se si po qëndroj në këmbë tani. Unë jam si një kështjellë rëre njerëzore. Mund të shpërbëhesha në dush”, tha DeGeneres.
Sipas Institutit Kombëtar të Shëndetit, osteoporoza është një "sëmundje e kockave që zhvillohet kur zvogëlohet dendësia minerale e kockave dhe masa e kockave", e cila çon në "një ulje të forcës së kockave që mund të rrisë rrezikun e frakturave".
Ajo shtoi se përtej osteoporozës, mjekët kanë konstatuar se vuan edhe nga artriti.
“Pata dhimbje torturuese një ditë dhe mendova se këputa një ligament apo diçka tjetër dhe bëra direkt një skaner. Mjekët më thanë se nuk është krisje apo thyerje, por artrit,” u shpreh moderatorja.
Fituesja e Emmy-t iu drejtua gjithashtu polemikës publike që e rrethoi pasi u akuzua për krijimin e një vendi pune që nxiti "racizëm, frikë dhe frikësim" në vitin 2020. Shfaqja më pas përfundoi në 2022 pas 19 sezonesh.
“Kur je personazh publik, je e hapur për interpretimin e të gjithëve. Dhe jam e sigurt që e keni dëgjuar thënien se, "Ajo çfarë mendojnë të tjerët për mua nuk është punë e imja." Sepse njerëzit do të thonë të gjitha llojet e gjërave dhe ju nuk keni kontroll mbi këtë. Por ju e dini të vërtetën dhe kjo është e gjitha që ka rëndësi,” përfundoi ajo.
